Сакратарыят АДКБ «з разуменнем» паставіўся да адмены Арменіяй супольных вучэнняў
Сакратарыят Арганізацыі дамовы калектыўнай бяспекі выступіў з каментаром з нагоды адмовы Арменіі ад правядзення ў 2023 годзе супольных вучэнняў АДКБ «Непарушнае братэрства – 2023» на сваёй тэрыторыі.
У АДКБ адзначылі, што правядзенне вучэнняў менавіта ў Арменіі прадугледжанае супольным планам і было раней пацверджанае ўладамі краіны. Таксама там паведамілі, што афіцыйна апавяшчэнняў ад армянскага боку аб адмене вучэнняў у адпаведнасці з устаноўленым у арганізацыі парадкам не атрымлівалі.
«Мы з разуменнем ставімся да існай сёння сітуацыі ў Рэспубліцы Арменія, якая не можа дазволіць у бягучым годзе паўнавартасна правесці запланаваныя міратворчыя вучэнні АДКБ», – заявілі ў арганізацыі.
І паабяцалі прыкласці «максімум намаганняў», каб вучэнні ўсё-такі адбыліся.
10 студзеня Арменія адмовілася праводзіць вучэнні міратворчых сілаў АДКБ «Непарушнае братэрства – 2023» на тэрыторыі краіны. Пра гэта заявіў прэм’ер-міністр краіны Нікол Пашыньян. Паводле яго, у існых умовах правядзенне вучэнняў прызнанае немэтазгодным.
«Міністр абароны Арменіі ўжо праінфармаваў Аб’яднаны штаб АДКБ, што ў гэтай сітуацыі мы лічым немэтазгодным правядзенне вучэнняў АДКБ [на тэрыторыі Арменіі], і яны не адбудуцца ў гэтым годзе», – сказаў прэм’ер-міністр Арменіі.
Летась Арменія звярталася па дапамогу да АДКБ праз канфлікт з Азербайджанам, аднак у выніку ў краіну скіравалі толькі місію назіральнікаў.
Якуб Хруст belsat.eu
