На тэрыторыі Ізраілю былі знойдзеныя целы прыкладна 1500 баевікоў «Хамасу». Пра гэта паведамляе «Associated Press» са спасылкай на Армію абароны Ізраілю.
Пакуль незразумела, ці суадносяцца гэтыя лічбы з лікам смерцяў, пра якія раней паведамлялі палестынскія ўлады, піша выданне.
Тым часам Ізраіль павялічыў мабілізацыю рэзервістаў да 360 000 асобаў. Гэта, нараўне з авіяўдарамі і афіцыйным абвяшчэннем вайны, сведчыць, што Ізраіль усё часцей пераходзіць да наступу на «Хамас», пагражаючы яшчэ большымі разбурэннямі ў густанаселеным і збяднелым сектары Газа.
Яшчэ невядома, ці будзе гэты наступ уключаць у сябе наземны напад. Апошні раз ён адбываўся ў 2014 годзе.
Тэрарысты групоўкі «Хамас» з сектару Газа 7 кастрычніка пачалі маштабны напад на Ізраіль, у выніку краіна перайшла ў стан вайны. Ізраіль абвясціў аднаўленне кантролю над усімі паселішчамі каля Газы, аднак баі працягваюцца.
Паводле звестак на вечар 9 кастрычніка, у выніку нападу «Хамасу» на Ізраіль загінулі больш як 900 ізраільцянаў і замежных грамадзянаў. Сама меней 2616 асобаў атрымалі раненні. У сектары Газа тым часам загінулі 687 палестынцаў і яшчэ 3800 атрымалі раненні. Таксама паведамляецца, што 17 палестынцаў, у тым ліку чацвёра дзяцей, загінулі ў выніку дзеянняў ізраільскай арміі на Заходнім беразе ракі Іярдан, 295 атрымалі раненні.
Якуб Хруст belsat.eu
