Армія абароны Ізраілю заявіла, што вайскоўцы вярнулі кантроль над усімі гарадамі каля мяжы з сектарам Газа, перадае «The Times of Israel». Пры гэтым не выключана, што баевікі «Хамасу» яшчэ застаюцца на ізраільскай тэрыторыі.
Спікер Арміі абароны Ізраілю Даніель Гагары заявіў, што войскі аднавілі кантроль над усімі гарадамі на мяжы з сектарам Газа. Паводле Гагары, у апошнія некалькі гадзінаў выпадкі сутыкненняў паміж вайскоўцамі і баевікамі «Хамасу» былі ізаляванымі.
Цяпер баявых дзеянняў няма ні ў адным горадзе краіны.
Гагары пры гэтым не выключыў, што ў памежных раёнах «усё яшчэ застаюцца тэрарысты».
Агароджу на мяжы з анклавам будуць ахоўваць танкамі пры падтрыманні гелікоптараў і беспілотнікаў, таксама праінфармаваў прадстаўнік войска.
Жыхароў 15 паселішчаў непадалёк Газы вывезлі, эвакуацыя працягваецца. Раней улады пастанавілі эвакуяваць людзей агулам з 24 мястэчак.
За двое содняў у войска мабілізавалі 300 тысячаў рэзервістаў.
Тым часам «Хамас» не спыняе ракетных атак на Ізраіль. Адзін снарад упаў блізу міжнароднага аэрапорту імя Бэн-Гур’ёна, інфармацыі пра пацярпелых і разбурэнні няма.
Паводле ацэнак Ізраілю, ад пачатку абстрэлаў баевікі выпусцілі каля 4400 ракетаў.
Ізраільскае войска, у сваю чаргу, працягвае атакаваць у Газе аб’екты «Хамасу» і групоўкі «Ісламскі джыхад». А міністр абароны габрэйскай дзяржавы Ёаў Галянт заявіў, што загадаў цалкам заблакаваць анклаў: «Там не будзе ані электрычнасці, ані харчоў, ані паліва».
Сяргей Крот belsat.eu
