У Расеі муніцыпальныя дэпутаты з Масквы і Санкт-Пецярбургу выступілі са зваротамі, у якіх запатрабавалі адстаўкі прэзідэнта РФ Уладзіміра Пуціна. Пра гэта паведамляе «Новая газета. Европа».
8 верасня ў Санкт-Пецярбургу Савет муніцыпальнага ўтварэння «Смальнінскае» заклікаў дэпутатаў Дзярждумы вылучыць абвінавачанне ў дзяржздрадзе супраць Пуціна, каб адхіліць яго ад пасады. Рашэнне падтрымалі сем дэпутатаў, а трое ўстрымаліся.
У звароце сказана, што з пачаткам поўнамаштабнай вайны ва Украіне ў дзеяннях Пуціна «прысутнічаюць прыкметы злачынства», прадугледжанага ў артыкуле пра дзяржздраду. Гэтак, з 24 лютага «знішчаюцца баяздольныя падраздзяленні арміі РФ, гінуць і становяцца інвалідамі маладыя працаздольныя грамадзяне», «пакутуе эканоміка Расеі» і «блок NATO пашыраецца на ўсход».
Ужо на наступны дзень на пяцярых дэпутатаў Смальнінскага склалі пратаколы за «дыскрэдытацыю» расейскай арміі.
Тым не менш, 9 верасня муніцыпальны савет Ламаносаўскай акругі Масквы заклікаў Пуціна скласці паўнамоцтвы, бо яго «погляды, мадэль кіравання безнадзейна састарэлі, і перашкаджаюць развіццю Расеі».
«Падваенне ВУП не здарылася, мінімальная зарплата не вырасла да заяўленых паказнікаў, з Расеі масава з’язджаюць разумныя і працаздольныя людзі, абяцанай стабільнасці няма і ў памоўцы», – гаворыцца ў звароце.
Паводле дэпутатаў, рыторыка Пуціна і ягоных падначаленых адкінула краіну ў эпоху Халоднай вайны, зноў узнікла пагроза ядравай вайны.
Якуб Хруст belsat.eu