Беларусь і Нікарагуа дамовіліся аб адмене віз. Неўзабаве беларусы змогуць знаходзіцца ў Нікарагуа без візы не больш за 90 дзён у годзе. Такія ж умовы для грамадзян Нікарагуа, якія збіраюцца ў Беларусь, гаворыцца ў міжурадавым пагадненні, якое апублікавана 6 студзеня.
Такі крок тлумачыцца неабходнасцю «развіваць і паглыбляць адносіны дружбы і супрацу».
Беларусам для ўезду ў Нікарагуа спатрэбіцца толькі пашпарт.
Пагадненне заключана на нявызначаны тэрмін і ўступае ў сілу праз 30 дзён «з дня атрымання па дыпламатычных каналах пісьмовага паведамлення аб выкананні бакамі ўнутрыдзяржаўных працэдур».
Раней Старшыня Савету Рэспублікі Наталля Качанава заяўляла, што «Нікарагуа – наш ключавы партнёр у Цэнтральнай Амерыцы». Аднак прамых зносін з гэтай краінай у Беларусі няма. Вылецець туды можна з Масквы. Усяго дарога з Менску да Нікарагуа зойме каля двух сутак.
У апошнія месяцы Беларусь таксама дамовілася пра бязвіз з Іранам і В’етнамам.
Арсен Рудэнка belsat.eu
