Баевікі расейскай ПВК Вагнэра пачалі рыхтаваць снайпераў для ўнутраных войскаў Беларусі
Telegram-канал унутраных войскаў Міністэрства ўнутраных справаў Беларусі, а таксама шэраг ананімных праўладных каналаў расказалі 31 студзеня пра ўдзел баевікоў расейскай ПВК Вагнэра ў рыхтаванні вайскоўцаў у Беларусі, у прыватнасці – снайпераў.
Група Вагнэра – незаконнае ўзброенае фармаванне паводле як расейскіх, так і беларускіх законаў. Але Крэмль актыўна выкарыстоўваў групоўку ў сваіх інтарэсах у іншых краінах, баевікі ваявалі ў краінах Афрыкі і бяруць актыўны ўдзел у вайне ва Украіне. Іх падазраюць у шматлікіх ваенных злачынствах.
Пасля няўдалай спробы мяцяжу летам 2023 года Аляксандр Лукашэнка запрасіў у Беларусь баевікоў і іхнага лідара Яўгенія Прыгожына. Частка баевікоў пакінула краіну, частка засталася ў Беларусі нават пасля смерці іхнага лідара. Выглядае, што баевікоў, якія засталіся, фінансуюць з бюджэту Беларусі.
31 студзеня беларускія сілавікі расказалі, што ў навучальным цэнтры ўнутраных войскаў распачаўся курс рыхтавання снайпераў пад кіраўніцтвам інструктара баевікоў Групы Вагнэра. На першых занятках, паводле сілавікоў, была звычайная для рыхтавання снайпераў тэорыя: характарыстыкі вінтоўкі і яе збіранне, табліцы стральбы, матэматычныя формулы і іншае. Заняткі былі як са звычайнай савецкай снайперскай вінтоўкай Драгунова, так і з нестандартнай вінтоўкай, імаверна, еўрапейскай ці амерыканскай вытворчасці. Найбліжэйшым часам абяцаюць пачатак практычных заняткаў для спецназаўцаў.
Але вагнэраўцы вучаць сілавікоў у Беларусі не толькі тэорыі. У той жа дзень унутраныя войскі пахваліліся, што трывае ўжо «шосты сезон» тактычна-спецыяльнага рыхтавання байцоў з удзелам інструктараў ПВК Вагнэра. За некалькі дзён лукашэнкаўскія спецназаўцы адпрацавалі з баевікамі рух у перадбаявым і баявым парадках, выкананне розных задачаў у лясістай мясцовасці.
Рыхтаваннем да суіцыдальных «мясных штурмаў», якімі група Вагнэра «праславілася» ва Украіне, МУС Беларусі не хваліўся.
Мяркуючы з раней злітага выступу перад спецназаўцамі намесніка міністра ўнутраных справаў, былога кіраўніка ГУБАЗіКу Мікалая Карпянкова, улады Беларусі лічаць, што трэба рыхтавацца ваяваць з беларускімі добраахвотнікамі, якія ваююць на баку Украіны, і тымі беларусамі, якія маюць вайсковае рыхтаванне ў іншых краінах. Праўда, прынамсі сам Карпянкоў слаба арыентуецца ў гэтых падраздзяленнях, блытае іх назвы.
Алесь Наваборскі belsat.eu
