Міністэрства ўнутраных справаў Беларусі паведаміла пра раскрыццё рэзананснай справы: асобу загінулага не маглі высветліць 23 гады, потым яшчэ год шукалі забойцу.
8 верасня 2002 года пад чыгуначным мостам у рацэ Мухавец знайшлі труп мужчыны без галавы і рук. Паводле МУС, з гэтай прычыны асобу загінулага не маглі высветліць так доўга.
У 2023 годзе сілавікі атрымалі інфармацыю, што да злачынства мелі дачыненне чатыры жыхары Берасця і Гомля, якія раней неаднаразова былі пад судом. Маўляў, у верасні 2001 гады яны выкралі і звязалі 30-летняга грамадзяніна Расеі, ударылі яго па галаве манціроўкай, прывязалі да яго каналізацыйныя люкі і скінулі з мосту ў ваду.
Труп быў знойдзены дзецьмі, якія рыбачылі ля берага, і выклікаў у горадзе немалы рэзананс.
Наколькі вядома, групоўка займалася кватэрнымі крадзяжамі і «шэрым рыэлтарствам» – завалодваннем жытлом асацыяльных грамадзянаў. Матывам забойства было знішчэнне канкурэнта ў крымінальным бізнесе.
Паводле прадстаўніка ГУБАЗіК Уладзіміра Гарагляда, мужчыну «скінулі ў ваду, калі ён быў яшчэ жывы». Як гэта ўвогуле магчыма, застаецца таямніцай.
У сакавіку 2024 года для затрымання трох мужчынаў прыцягнулі спецыяльнае падраздзяленне для барацьбы з тэрарызмам «Алмаз». Але тады затрымалі толькі трох удзельнікаў злачыннай групы, адзін дагэтуль абвешчаны ў вышук.
Паралельна высветлілася, што за год да забойства, у 2001 годзе, яны ўчынілі разбойны напад на кватэру мясцовага прадпрымальніка, пад пагрозай ужывання зброі звязалі непаўналетнюю дачку і забралі каштоўныя рэчы і грошы.
У 2025 годзе Берасцейскі абласны суд прысудзіў іх да пазбаўлення волі на тэрмін ад 22 да 24 гадоў.
Пры гэтым ваўкавыскага прадпрымальніка Мікалая Аўтуховіча, якога абвінавачвалі паводле 12 артыкулаў Крымінальнага кодэксу, у тым ліку ў здрадзе дзяржаве і акце тэрарызму, прыгаварылі да большага тэрміну, чым гэтых забойцаў: 25 гадоў калоніі строгага рэжыму. Па 20 гадоў пазбаўлення волі атрымалі Павел Сава і Галіна Дзербыш. Вольга Маёрава атрымала 21,5 года зняволення. Падчас дзеянняў гэтай «групоўкі» з людзей пенсійнага ўзросту ніхто не пацярпеў, а ўсе абвінавачаныя потым прызнаныя палітзняволенымі.
Паводле версіі абвінавачання, удзельнікі так званай групы Аўтуховіча хацелі зрынуць уладу ў Беларусі «з дапамогай украінскіх спецслужбаў», а таксама «планавалі і ажыццяўлялі тэракты» і «ўвозілі зброю з Украіны».
Тэса Анэйда belsat.eu
