Дзяржаўны сакратар ЗША заявіў, што закрывае цэнтр барацьбы з дэзынфармацыяй, каб абараніць тых, каго пераследуюць за выказванне меркавання. Прэзідэнт ЗША тым часам атакуе свабоду слова.
Дзяржаўны сакратар (міністр замежных справаў) Злучаных Штатаў Маркаў Руб’ёў абвясціў 16 красавіка пра закрыццё Цэнтру барацьбы з замежным маніпуляваннем інфармацыяй і ўмяшаннем пры Дзяржаўным дэпартаменце (R/FIMI), былы Цэнтр глабальнага ўзаемадзеяння (GEC). Гэты цэнтр займаўся барацьбой з замежнай дэзынфармацыяй.
Паводле Руб’ёў, за мінулай адміністрацыяй праца гэтага цэнтру каштавала 50 млн долараў на год. Бюджэт цэнтру не публікавалі ў адкрытых крыніцах, але за дзень да публікацыі пастановы Руб’ёў сталася вядома, што ён скасаваў гранты, звязаныя з дэзынфармацыяй, на суму звыш 20 млн долараў, у тым ліку грант «Адказ на дэзынфармацыю праз крэатыўны кантэнт у Беларусі» на 2,4 млн долараў, падобныя гранты для Балгарыі, Малдовы, Узбекістану і іншых краінаў. На што менавіта мелі пайсці гэтыя гранты, невядома: дэталі пра іх не публікаваліся, а апытаныя «Белсатам» беларускія эксперты сказалі, што не чулі пра такі грант для Беларусі.
Паводле заявы Руб’ёў, ЗША «выдаткоўвалі мільёны долараў на тое, каб актыўна замоўчваць і цэнзураваць галасы амерыканцаў, якім яны павінны былі служыць», амерыканцаў «звальнялі з працы, абвінавачвалі і нават саджалі ў турму проста за тое, што яны выказвалі свае думкі». Мільярдэр Ілан Маск, які цяпер фактычна ўзначальвае Дэпартамент эфектыўнасці дзяржаўнага кіравання (DOGE), у 2023 годзе называў гэты цэнтр «найгоршым у дзяржаўнай цэнзуры ЗША».
Тым часам прэзідэнт ЗША Доналд Трамп даручае пачынаць расследаванні супраць сваіх крытыкаў, пагражае незалежным медыям і спыняе фінансаванне грамадскіх медыяў, замарожвае фінансаванне Гарвардскага ўніверсітэту за ідэалагічную нязгоду, дапускае арышты пратэстоўцаў і не выключае дэпартацыі грамадзянаў ЗША ў турмы ў Эль-Сальвадоры.
Месяц таму Агенцтва ЗША ў справе глабальных медыяў (USAGM) заявіла пра спыненне гранту для радыё «Свабодная Еўропа» / радыё «Свабода» (RFE/RL). Беларуская служба радыё «Свабода» была вымушаная адправіць частку рэдакцыі ў адпачынак у выніку праблемаў з фінансаваннем, а праект «Настоящее Время. Беларусь» прыпыніў трансляцыю. Украінская служба радыё «Свабода» скараціла вяшчанне. Расейская служба радыё «Свабода» спыніла радыётрансляцыю на сярэдніх хвалях і засталася без спадарожнікавай трансляцыі. Праект «Голас Амерыкі» збіраліся закрыць, але ліквідацыю медыя спыніў суд.
Алесь Наваборскі belsat.eu
