Беларуская служба радыё «Свабода» вымушаная адправіць частку рэдакцыі ў адпачынак праз праблемы з фінансаваннем. Тым не менш, медыя працягвае сваю працу.
Паводле заявы рэдакцыі, цяпер кампанія не мае належных сродкаў для паўнавартаснай працы, а таму вымушаная адправіць частку рэдакцыі ў адпачынак. Праз гэта найбліжэйшым часам публікацыяў на платформах РС стане прыкметна менш. У прыватнасці, будуць прыпыненыя праекты «ПіК Свабоды», «Тлумачым з Гурневічам», відэападкасты «Гісторыя на Свабодзе» і «Куды коціцца свет».
Тым не менш, радыё «Свабода» паводле магчымасці працягвае сваю працу, каб «несці дэмакратычныя каштоўнасці праз дакладныя, нецэнзураваныя навіны і адкрытыя дыскусіі».
15 сакавіка Агенцтва ЗША ў справе глабальных медыяў (USAGM) заявіла пра спыненне гранту для «Радыё Свабодная Еўропа / Радыё Свабода» (RFE/RL). Гэта адбылося праз некалькі гадзінаў пасля публікацыі ўказу прэзідэнта ЗША Доналда Трампа, які заклікаў да скарачэння сямі федэральных агенцтваў – у тым ліку USAGM – да «максімальнай ступені, што адпавядае дзейнаму заканадаўству».
25 сакавіка акруговы суд у Вашынгтоне задаволіў пазоў RFE/RL, загадаўшы USAGM перапыніць спробы закрыць медыякарпарацыю. У выніку 26 сакавіка USAGM паведаміла, што скасоўвае сваю заяву аб спыненні гранту, але падкрэсліла, што захоўвае за сабой права спыніць яго вылучэнне ў будучыні. Тым не менш, пакуль грантавага фінансавання не адбылося, таму «кампанія не мае належных сродкаў для паўнавартаснай працы».
Якуб Хруст belsat.eu
