Амаль усе працаўнікі медыя «Голас Амерыкі» адпраўленыя ў вымушаны адпачынак, таксама спынены грант Кангрэсу ЗША на фінансаванне радыё «Свабода». Гэта адбылося пасля ўказу Трампа аб скарачэнні «да мінімуму» сямі федэральных агенцтваў, у тым ліку Агенцтва ў справе глабальных медыяў.
«"Голас Амерыкі" і радыё "Свабода" зрабілі важкі ўнёсак як у трыумф ЗША ў халоднай вайне, гэтак і ў распаўсюд ідэяў свабоды і дэмакратыі ў Еўропе. Яны ж папсавалі багата крыві камуністычным уладарам і іх дзяржбяспецы. Зліквідаванне "Голасу Амерыкі" і радыё "Свабода" – удар па прэстыжы ЗША і па свабодзе ў свеце. Яно ж умацоўвае надзею крамлёўскіх рэваншыстаў павярнуць назад кола гісторыі», – напісаў у сваім Telegram-канале палітычны аглядальнік Аляксандр Фрыдман.
Прэзідэнт ЗША Доналд Трамп раней загадаў скараціць «да мінімуму» 7 федэральных агенцтваў, у тым ліку Агенцтва ЗША ў справе глабальных медыяў (USAGM), што курыруе радыё «Свабода», «Голас Амерыкі» ды іншыя СМІ.
Пасля гэтага дырэктар «Голасу Амерыкі» Майкл Абрамовіц абвясціў спыненне працы. Ён разам з амаль усім персаналам, а гэта 1300 асобаў, адпраўлены ў вымушаны адпачынак.
«Упершыню за 83 гады легендарны "Голас Амерыкі" замаўкае. Сённяшнія дзеянні не дазволяць "Голасу Амерыкі" выканаць сваёй жыццёва важнай місіі. Гэтая місія асабліва важная сёння, калі супернікі Амерыкі – Іран, Кітай і Расея – выдаткоўваюць мільярды долараў на стварэнне хлуслівых наратываў дзеля дыскрэдытацыі Злучаных Штатаў», – напісаў Абрамовіц у сацыяльнай сетцы LinkedIn.
Ён адзначыў, што гэтае медыя дае аб'ектыўную і збалансаваную інфармацыю, што асабліва важна для тых, хто жыве ва ўмовах тыраніі, і выказаў упэўненасць: нават калі кампанія выжыве, дзеянні Трампа «нанясуць сур'ёзную шкоду здольнасці "Голасу Амерыкі" спрыяць стварэнню бяспечнага і свабоднага свету і не здолеюць абараніць інтарэсы ЗША».
Тым часам радыё «Свабода» засталося без грошай: быў спынены грант Кангрэсу ЗША на фінансаванне кампаніі. Кіраўнік медыя Стывэн Капус назваў гэта «велізарным падарункам ворагам Амерыкі»:
«Іранскія аятолы, кітайскія камуністычныя лідары і аўтакраты ў Маскве і Менску будуць святкаваць смерць RFE/RL пасля 75 гадоў. Перамога нашых супернікаў зробіць іх мацнейшымі, а Амерыку слабейшаю».
Ён канстатаваў, што цяпер мільёны чалавек у закрытых грамадствах не змогуць даведацца праўды пра Амерыку і свет.
Сцяпан Кубік belsat.eu
