Адмысловы трыбунал у Гаазе (Нідэрланды), які маюць намер стварыць для пераследу за агрэсію супраць Украіны, не будзе судзіць Уладзіміра Пуціна завочна, пакуль ён застаецца прэзідэнтам. Пра гэта паведамляе «Euronews».
Як расказалі выданню два еўрапейскія чыноўнікі, знаёмыя з працэсам, не будзе завочна судзіць не толькі Уладзіміра Пуціна датуль, пакуль ён застаецца прэзідэнтам Расейскай Федэрацыі, але і прэм'ер-міністра РФ Міхаіла Мішусціна і міністра замежных справаў Сяргея Лаўрова. Судовы пераслед іх будзе дазволены толькі ў тым выпадку, калі яны будуць фізічна прысутнічаць у зале суда або пасля іх сыходу са сваіх пасадаў.
Такія ўмовы выкладзены ў праекце пагаднення, якое забяспечыць прававую аснову для стварэння адмысловага трыбунала ў рамках Рады Еўропы.
Тэхнічная праца па стварэнні трыбуналу завяршылася ў канцы сакавіка падчас сустрэчы так званай «асноўнай групы» ў Страсбургу, якая падрыхтавала тры асобныя праекты дакументаў: двухбаковае пагадненне паміж Украінай і Радай Еўропы, статут адмысловага Трыбуналу і пагадненне, якое вызначае парадак кіравання адмысловым трыбуналам. Падпісанне запланаванае на 9 траўня ў Кіеве.
Абмежаванні на завочны суд разглядаюцца як кампраміс паміж краінамі, адзначыў прадстаўнік ЕЗ.
Пасля падпісання пагаднення Кіевам тэкст будзе вынесены на галасаванне ў Парламенцкай асамблеі Рады Еўропы, дзе сабраныя прадстаўнікі 46 краінаў, якія ўваходзяць у арганізацыю. Для ратыфікацыі дакументу неабходная большасць у дзве траціны галасоў. Чакаецца, што такія краіны, як Канада, Аўстралія, Новая Зеландыя і Японія, далучацца да ініцыятывы, што павысіць яе легітымнасць. А вось Злучаныя Штаты, наўрад ці возьмуць удзел у трыбунале.
,,«Больш як 38 дзяржаў выказалі палітычную падтрымку стварэнню Трыбунала, а таксама Еўрапейскі Звяз», – паведаміў «Euronews» прадстаўнік Рады Еўропы.
Ідэя стварэння адмысловага трыбунала ў злачынствах агрэсіі супраць Украіны была падтрыманая прэзідэнтам Уладзімірам Зяленскім, каб забяспечыць адказнасць за поўнамаштабнае ўварванне, пачатае Пуціным 24 лютага 2022 года.
Разам з тым адзначым, што 17 сакавіка 2023 года ордар на арышт Пуціна за вайсковыя злачынствы ва Украіне выдаў Міжнародны крымінальны суд. Але не ўсе краіны-падпісанты Рымскага статуту, гэта значыць прызнаюць моц пастановаў МКС, пагаджаюцца арыштаваць палітыка.
Якуб Хруст belsat.eu
