Аб’яднаны пераходны кабінет Беларусі (АПК) выступіў з заявай адносна месца і будучыні Беларусі ў архітэктуры рэгіянальнай бяспекі ў Еўропе.
У сваёй заяве АПК назваў стратэгічна важнай і цалкам падтрымаў пазіцыю прэзідэнта Украіны Уладзіміра Зяленскага адносна таго, што «ўсходняя мяжа Украіны, усходняя мяжа Беларусі, усходнія межы краінаў Балтыі, усходняя мяжа Фінляндыі – гэта самая моцная лінія бяспекі для ўсіх нас у Еўропе, бо гэта рыса міжнароднага права».
«Кабінет адзначае, што рэгіянальная бяспека можа быць рэальна гарантаваная толькі пры ўмове існавання незалежнай дэмакратычнай і еўрапейскай Беларусі. Падкрэсліваем неабходнасць правядзення перамоваў пра будучыню рэгіянальнай бяспекі ў Еўропе з улікам інтарэсаў беларускага народу, Украіны і Еўрапейскага Звязу», – гаворыцца ў заяве.
Кабінет упэўнены, што беларускі народ можа стацца донарам сістэмы рэгіянальнай бяспекі пры ажыццяўленні дэмакратычных зменаў у Беларусі, і абяцае рабіць усё магчымае, каб беларусы занялі сваё годнае месца ў еўрапейскай сям’і народаў.
На Мюнхенскай канферэнцыі аб бяспецы прэзідэнт Украіны акрэсліў, дзе мае прайсці мяжа «паміж вайною і мірам», а фактычна – паміж Расеяй і Захадам. Паводле яго, у гэтую лінію бяспекі трэба залучыць усходнюю мяжу Беларусі. Украінскі прэзідэнт таксама адзначыў, што Расея рыхтуе новыя дывізіі са 150 тысячамі жаўнераў, і папярэджанне пра пагрозу беларуска-расейскіх вучэнняў, якія плануюцца сёлета:
«Гэта тое ж, як яны разварочвалі войскі перад поўнамаштабным уварваннем ва Украіну тры гады таму. Гэтыя расейскія сілы ў Беларусі для нападу на Украіну? Імаверна. А можа, і не. Можа, яны для вас? Дазвольце нагадаць, што Беларусь мяжуе з трыма краінамі NATO, яна сталася плацдармам для расейскіх вайсковых аперацыяў».
Спаслаўшыся на заявы Уладзіміра Пуціна і Аляксандра Лукашэнкі, Зяленскі адзначыў, што ў Беларусі цяпер маецца «забароненая зброя, ракеты сярэдняй далёкасці і нават ядравая зброя». Паводле яго, «Пуцін выразна разглядае Беларусь проста як іншы рэгіён Расеі», і Захад мусіць быць гатовы «да наступнага ўварвання».
Лідарка беларускіх дэмакратычных сілаў Святлана Ціханоўская 18 лютага на сустрэчы з амбасадарамі і кіраўнікамі дыпламатычных місіяў 25 краінаў, акрэдытаваных у Літве, адзначыла, што мірныя перамовы датычаць не толькі Украіны, але «закранаюць увесь рэгіён: Беларусь, Малдову, бяспеку ўсёй Еўропы».
«Пытанне Беларусі мусіць быць залучанае ў абмеркаванні. І калі нас там няма, мы спадзяёмся, што вашыя ўрады і Еўрапейскі Звяз будуць нашым голасам. Менавіта таму мы выступаем за тое, каб Еўрапейскі Звяз быў за перамоўным сталом», – сказала Ціханоўская.
Якуб Хруст belsat.eu
