«Белсат» падводзіць вынікі апошніх содняў поўнамаштабнай вайны.
«Белсат» падводзіць вынікі апошніх содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 22 ліпеня чытайце ў нашым аглядзе.
Паводле звестак Генеральнага штабу ЗСУ, з моманту поўнамаштабнага ўварвання ва Украіну страты расейскага войска дасягнулі 39 тысяч чалавек забітымі.
Пры ўсім гэтым цягам апошніх содняў войскі РФ не спынялі наступальных дзеянняў з мэтай займець поўны кантроль над тэрыторыяй Данбасу і іншымі рэгіёнамі Украіны.
Па-ранейшаму найбольш спакойная сітуацыя адзначаецца на поўначы Украіны – на валынскім і палескім кірунках. Пры гэтым адзначаецца, што тэрмін праверкі баявой гатоўнасці Узброеных сілаў Беларусі працягнуты да 31 ліпеня.
На суседнім сіверскім кірунку расейцы працягваюць здзяйсняць паветраную выведку з дапамогаю беспілотнікаў, таксама для дэманстрацыі сваёй прысутнасці войскі РФ абстралялі ўкраінскія пазіцыі і цывільную інфраструктуру ў ваколіцах населеных пунктаў Камянская Слабада і Мікалаеўка Чарнігаўскай вобласці, Волфіна і Паўлаўка Сумскай вобласці.
На харкаўскім кірунку вораг абстраляў з артылерыі тэрыторыі каля Масьпанава, Пятроўкі, Рускіх Цішкаў, Дзяменцееўкі, Золачава, Старой Гніліцы, Пушкарнага, Вялікай Бабкі, Слаціна і Лябяжага.
На славянскім кірунку абстрэлы зафіксаваныя каля Дзіброўнага, Чэпілю, Адамаўкі, Карнавухаўкі, Мікольскага, Курулькаў, Хрэстышча і Мазанаўкі.
На краматорскім кірунку вораг праводзіць штурмавыя дзеянні ў бок лініі Верхнякаменка – Верхнякаменскае, баявыя дзеянні працягваюцца. Таксама акупанты абстралялі з танкаў і артылерыі ваколіцы населеных пунктаў Данецкае, Серабранка, Верхнякаменскага, Спірнае і Івана-Дар’еўка.
На суседнім бахмуцкім кірунку расейцы праводзілі штурмавыя дзеянні ў бок лініяў Даламітнае – Новалуганскае і Страпаўка – Салядар, але панеслі страты ды ў выніку адступілі. Таксама расейцы працягваюць спробы наступу ў бок Вуглягорскай ЦЭС і Пакроўскага, баявыя дзеянні працягваюцца.
Акрамя гэтага акупанты здзейснілі абстрэлы тэрыторыяў каля населеных пунктаў Бераставое, Бахмут, Касцянцінаўка, Белагораўка, Пакроўскае, Кодзема, Вясёлая Даліна, Нью-Ёрк, Якаўлеўка, Васюкаўка і іншых.
На аўдзееўскім, навапаўлаўскім і запарожскім кірунках зафіксаваныя артылерыйскія абстрэлы каля населеных пунктаў Пяскі, Аўдзееўка, Новаміхайлаўка, Прачыстаўка, Залізнічнае, Паўлаўка, Урэмаўка, Новаандрэеўка, Шаўчэнка, Валадзіміраўка, Наваякаўлеўка, Камянскае, Палтаўка і іншых.
На паўднёвабужскім кірунку асноўныя намаганні расейцаў былі скіраваныя на ўтрыманні ўжо занятых пазіцыяў і недапушчэнні прарыву ўкраінскіх сілаў, дзеля чаго былі ўведзеныя рэзервовыя падраздзяленні акупантаў.
Спробы штурмавых дзеянняў расейцаў у бок лініяў Малая Семяйдзінуха – Андрэеўка і Давідаў Брод – Белагорка аказаліся няўдалымі.
Пры гэтым яны здзейснілі абстрэлы ўкраінскіх тэрыторыяў у ваколіцах населеных пунктаў Іванаўка, Токарава, Трудалюбаўка, Партызанскае, Кобзарцы, Андрэеўка, Стэпавая Даліна,Таўрыйскае, Аленаўка, Прыбужскае, Ліманы, Кісялёўка, Новамікалаеўка, Мікалаеў і іншых.
У сваю чаргу ўкраінская авіяцыя цягам апошніх содняў нанесла восем удараў па пазіцыях расейцаў і іхных складах боепрыпасаў на поўдні краіны. Пра гэта паведаміла аператыўнае камандаванне «Південь».
Тым часам ювенальныя пракуроры Украіны паведамілі, што з моманту поўнамаштабнага ўварвання расейскіх войскаў у краіну загінулі 358 дзяцей, яшчэ 683 дзіцяці атрымалі раненні рознай ступені цяжкасці.
Таксама 22 ліпеня паміж прадстаўнікамі ААН, Украіны і Турцыі было падпісанае пагадненне пра экспарт збожжа з украінскіх партоў. Вызначана, што знаходзіцца ў партах змогуць выключна тыя судны, якія ўдзельнічаюць у перапраўцы зерня ды іншых падобных харчовых прадуктаў. Кантраляваць парты «Адэса», «Чарнаморск» і «Паўднёвы» будзе ўкраінскі бок.
BK belsat.eu
