Прычына – у санкцыях
Пасля таго, як 13 кастрычніка анлайн-банк «Revolut» увёў абмежаванні на выкарыстанне сваіх картак на тэрыторыі Беларусі, выданне «Motolko Help» высветліла, што яшчэ 7 банкаў і фінтэхсэрвісаў заблакавалі дзеянне сваіх картак у нашай краіне.
Так, стала вядома, што з 11 кастрычніка ў сувязі з санкцыямі супраць Расеі і Беларусі абслугоўваць свае карты ў Беларусі перастаў літоўскі «Šiaulių bankas».
Картамі «Luminor Bank» з 25 верасня немагчыма разлічыцца ў гандлёвых і сэрвісных пунктах, а таксама ў інтэрнэт-крамах, нельга таксама зняць з іх гатоўку.
Шведскі «SEB Bank» з 5 верасня ўвёў абмежаванні абслугоўвання сваіх картак у сувязі з санкцыямі.
Шведская група «Swedbank» перастала абслугоўваць свае карткі з 6 верасня – з іх немагчыма разлічыцца ў гандлёвых і сэрвісных пунктах, а таксама зняць з іх гатоўку на тэрыторыі краіны. Такія ж абмежаванні ўвялі літоўскі і латвійскі філіялы банка.
Вядомая фінтэхкампанія з Вялікай Брытаніі «Wise» таксама ўвяла забарону на выкарыстанне сваіх картак на тэрыторыі Беларусі, уключыўшы яе ў спіс краін, дзе яе карты не працуюць.
Эстонскі «Coop Pank» забараніў аперацыі са сваімі карткамі ў гандлёвых і сэрвісных пунктах, а таксама ў інтэрнэт-крамах на тэрыторыі Беларусі з 11 верасня. А праз пяць дзён пасля гэтага ўвёў таксама абмежаванне на магчымасць зняцця гатоўкі ў банкаматах.
З 2 кастрычніка абмежаванні на аплату і зняцце гатоўкі ў банкаматах увёў латвійскі банк «Citadele».
Раман Шавель belsat.eu
