«Белсат» працягвае адсочваць факты рэпрэсіяў у дачыненні беларусаў, нязгодных з палітыкай уладаў, з фальсіфікацыяй выбараў і вайною ва Украіне.
Стала вядома пра маштабны рэйд КДБ 20 і 21 сакавіка па розных гарадах Беларусі, піша «Вясна». Падрабязнасці невядомыя, але па яго выніках частку людзей нібыта змясцілі ў СІЗА КДБ. Маецца інфармацыя, што некаторым затрыманым інкрымінуюць «тэрарыстычныя» артыкулы.
Былую беларускую журналістку Наталлю Судлянкову і супрацоўніка расейскай спецслужбы ГРУ Аляксея Шаўрова дадалі ў чэшскі нацыянальны санкцыйны спіс. Пра гэта 2 красавіка паведаміла Служба інфармацыйнай бяспекі Чэхіі (BIS),піша радыё «Свабода».
Паводле міністра замежных справаў Чэхіі Яна Ліпаўскага, Наталля Судлянкова – ключавая супрацоўніца расейскай вайсковай выведкі ГРУ і шмат гадоў таемна ды свядома працавала на некалькі расейскіх арганізацыяў у Чэшскай Рэспубліцы.
Прэм’ер-міністр Пэтр Фіяла пасля пасяджэння Кабінету Міністраў заявіў, што, паводле высноваў Службы інфармацыйнай бяспекі (BIS), Судлянкова выконвала аперацыі ГРУ ў Чэшскай Рэспубліцы, якія ішлі беспасярэдне з Масквы, а кіраваў ёю Шаўроў.
Сайт і сацсеткі Цэнтру новых ідэй прызналі экстрэмісцкім. Установа пазіцыянуе сябе як «даследчы інстытут, які дапамагае грамадскім і палітычным актарам пабудаваць дэмакратычную і ўстойлівую Беларусь».
Таксама ў спіс «экстрэмісцкіх матэрыялаў» гэтым разам трапілі:
- тэлеграм-каналы і чаты «Дикі шершні | Ударні дроникамікадзе», «Витебские Вести»;
- Instagram-старонкі marina.zelenaja, bhb_ataman;
- YouTube-канал «Ямницкий Флот»;
- старонкі ў «Однаклассниках» «Игорь Козлов», «Бандеровский Хохол», «Александр Моисеев»;
- старонкі ў TikTok «ПАЛIТВЯЗЕНЬ», Kalinouski Polk.
Паводле «Белсату», супрацоўнікі КДБ уварваліся ў кватэру ў Менску, дзе пражываў Максім Урбановіч, малодшы брат Дзяніса Урбановіча, які з самога пачатку поўнамаштабнага ўварвання расейскіх войскаў ва Украіну ваюе ў складзе ЗСУ з пазыўным Ваўкалак.
Вядома, што пасля правядзення ператрусу Максіма Урбановіча затрымалі. Паводле папярэдніх звестак, кватэру, дзе ён жыў з дзяўчынай, апячаталі.
Дзе цяпер утрымліваюць Максіма, невядома. Як і тое, што было прычынаю ператрусу і затрымання. Дзяніс Урбановіч даўно не стасуецца з братам і мінімум два гады з ім не размаўляў. Пра гэты выпадак ён нічога не ведае.
Надзея Вольная / belsat.eu
