Міністэрства гандлю, прамысловасці і энергетыкі Паўднёвай Карэі анансавала пашырэнне пераліку тавараў, на якія будзе распаўсюджвацца экспартны кантроль пры продажы ў Беларусь і Расею, прыкмеціла выданне «Reform.by».
Усяго ў гэты пералік дададзеныя 682 пазіцыі, агулам жа колькасць пазіцыяў у спісе дасягне 1159.
Да дадатковых тавараў адносяцца прадметы, што з вялікай доляй імавернасці могуць выкарыстоўвацца для ваенных мэтаў: напрыклад, цяжкая будаўнічая тэхніка, акумулятарныя батарэі, станкі і дэталі самалётаў.
Экспарт такіх тавараў у нашую краіну, а таксама ў Расейскую Федэрацыю будзе забаронены, але адзначаецца, што дазвол можна будзе атрымаць у прыватным парадку пры ўмове, што кантракты былі заключаныя яшчэ да ўступлення ў сілу рашэння, або ў выпадку, калі экспарт здзяйсняецца даччынымі кампаніямі.
Адзначаецца, што міністэрства мае намер удасканаліць парадак экспартнага кантролю.
Рашэнне набудзе моц пасля таго, як будуць завершаныя фармальныя працэдуры. Чакаецца, што гэта адбудзецца ў пачатку 2024 года.
Нагадаем, што ў красавіку 2023 года Паўднёвая Карэя ўжо дадала ў спіс тавараў, для якіх узмацняецца экспартны кантроль, 741 пазіцыю. Тады ў спіс тавараў, экспарт якіх забаронены, увайшлі дэталі аўтамабіляў, даражэйшых за 50 тысяч долараў, паўправаднікі, будаўнічае абсталяванне, каштоўныя камяні, а таксама тавары, звязаныя з хімікатамі, сталлю, машынабудаваннем, квантавымі камп’ютарамі і іншыя.
Раман Шавель belsat.eu