Беларускія добраахвотнікі з палка Каліноўскага аб’явілі аб стварэнні новага батальёна «Western». У яго ўвойдуць прафесійныя вайскоўцы з іншых краінаў, паведамляе прэс-служба палка.
«У батальён ужо ўвайшлі афіцэры краін NATO і замежныя грамадзяне, якія маюць баявы досвед у Іраку і Афганістане. Усе яны да прыбыцця ва Украіну служылі ў прафесійных узброеных сілах розных дзяржаў, якія ўваходзяць у паўночнаатлантычны альянс. Нашыя замежныя пабрацімы цалкам падзяляюць права ўкраінскага і беларускага народаў на свабоду і дэмакратыю. Яны гатовыя дапамагаць нам, каб разам дасягнуць перамогі», – паведамляе прэс-служба палка Каліноўскага.
У батальён гатовы прыняць людзей толькі з вопытам службы ў прафесійных войсках, людзей без папярэдняга ваеннага вопыту ў яго прымаць не будуць.
Раней, 5 верасня, полк Каліноўскага афіцыйна паведаміў, што цалкам прыпыняецца набор рэкрутаў ва ўсе падраздзяленні. Аднак 21 верасня вайскоўцы аднавілі набор. Падрабязнасці аб спыненні рэкрутынгу абяцалі даць праз некаторы час.
Алена Рувіна belsat.eu