Дакументальны фільм «Навальны» аб расейскім апазіцыйным палітыцы Аляксеі Навальным намінаваны на кінапрэмію «Оскар». Карціна канадскага рэжысёра Дэніэла Роэра прадстаўлена ў катэгорыі «Лепшы поўнаметражны дакументальны фільм», паведамляецца на сайце Амерыканскай акадэміі кінамастацтва.
Фільм распавядае пра Аляксея Навальнага і падзеі, якія адбываліся ў 2020, калі палітыка атруцілі. Здымкі пачаліся пасля выхаду Навальнага з комы ў верасні 2020 года і працягваліся да яго арышту ў студзені 2021 года. Здымачная група была побач з Навальным нават на памежным кантролі ў аэрапорце.
Цяпер Навальны адбывае тэрмін у калоніі строгага рэжыму №6 у Мелехава Уладзімірскай вобласці. Здымкі адбываліся ажно да арышту Аляксея Навальнага ў 2021 годзе. Сам рэжысёр абазначыў жанр свайго фільму як палітычны трылер і апісаў яго як «гісторыю аднаго чалавека і яго барацьбы з аўтарытарным рэжымам».
У гэтай жа катэгорыі намінаваны ўкраінскі фільм «Дом з аскепкаў». Гэта фільм пра ўкраінскіх дзяцей, якія жывуць у прытулку, размешчаным побач з лініяй фронту. Фільм паказвае жыццё не толькі дзяцей, але дарослых: украінскіх сацыяльных работнікаў, якія спрабуюць стварыць дзецям камфортныя ўмовы жыцця ў такой складанай сітуацыі.
На перамогу ў самай прэстыжнай катэгорыі – за лепшы кінафільм – прэтэндуюць наступныя фільмы:
- «На заходнім фронце без пераменаў» (All Quiet on the Western Front)
- «Аватар: Шлях вады» (Avatar: The Way of Water)
- «Баншы Інішэрына» (The Banshees of Inisherin)
- «Элвіс» (Elvis)
- «Усё ўсюды і адразу» (Everything Everywhere All At Once)
- «Фабельманы» (The Fabelmans)
- «Тар» (Tar)
- «Топ Ган: Мэверык» (Top Gun: Maverick)
- «Трыкутнік смутку» (Triangle of Sadness)
- «Гавораць жанчыны» (Women Talking)
Цырымонія ўручэння прэміі «Оскар» пройдзе 12 сакавіка.
Алена Рувіна belsat.eu
