Галоўны рэдактар Reform.by Фёдар Паўлючэнка заявіў, што фінансавання ў праекту засталося на паўтара-два месяцы працы.
«Праект Reform.by на мяжы закрыцця. Гэта не перабольшанне і не шантаж. На нашым рахунку грошай на паўтара-два месяцы працы. Ні ў кога з нашай рэдакцыі няма падушкі бяспекі, без мінімальнага заробку мы працаваць фізічна не зможам. Я ўжо не кажу пра звычайныя накладныя выдаткі – хостынг, аплата дамену, купля падпісак на сэрвісы, тэхніка і шмат што іншае», – гаворыцца ў заяве Фёдара Паўлючэнкі.
Паводле галоўнага рэдактара, 19 снежня Reform.by адмовіў ключавы еўрапейскі інстытуцыйны донар, падтрымка якога дазволіла б выданню працягнуць працу.
У сваёй заяве Паўлючэнка падзякаваў камандзе за самаадданую працу і паабяцаў «яшчэ пазмагацца за наш праект».
«Я прыкладу ўсе намаганні, абяцаю. Чалавек, які мае дзве ныркі, не можа сказаць, што праект закрываецца», – дадаў ён.
Праект быў створана ў 2018 годзе журналістамі Аляксеем Жукавым, Аляксандрам Атрошчанкавым і Фёдарам Паўлючэнкам. Пасля 2020 года Reform.by быў забаронены ў Беларусі, рэдакцыя выдання вымушана працаваць з-за мяжы. Паводле галоўнага рэдактара, пасля ад’езду з Беларусі каманда праекту ўвесь час прыкладала «максімум намаганняў, каб прадоўжыць працу за межамі Беларусі», нягледзячы на тое, што «даводзілася працаваць па 18 гадзін за содні» і «грошай заўсёды было на 3-4 месяцы».
Сёлета Reform.by стала лаўрэатам прэміі Free Media Awards.
У верасні 2023 году журналісты выдання апублікавалі рэзананснае расследаванне аб супрацоўніке КДБ, які жыве ў Польшчы, а таксама знайшлі імаверную прычыну, паводле якой супраць журналісткі «Белсат» Кацярыны Андрэевай распачалі новую крымінальную справу аб «здрадзе дзяржаве».
Глеб Нержын belsat.eu
