Урад назваў машыны, за якія трэба плаціць высокі падатак. Шмат з іх ёсць у аўтапарку Лукашэнкі
Савет міністраў сваёй пастановай № 194 ад 20 сакавіка зацвердзіў пералік транспартных сродкаў павышанай камфортнасці. Дакумент ужо апублікаваны на Нацыянальным прававым інтэрнэт-партале, ён датычыць стасункаў, якія ўзніклі з 1 студзеня 2024 года.
Паводле пастановы, за ўключаныя ў пералік аўтамабілі давядзецца плаціць транспартны падатак у дзесяцікратным памеры, калі з моманту іх выпуску прайшло не больш за тры гады. У дакуменце пералічаныя:
- Audi A8 *, Q8 *, R8 *, RS6 *, RS7 *, RSQ8 *, S8 *, SQ8 *
- Aston Martin (усе мадэлі)
- Aurus (усе мадэлі)
- Bentley (усе мадэлі)
- BMW 7 *, 8 *, M5 *, M6 *, M7 *, M8 *, X6 *, X7 *, XM *
- Bugatti (усе мадэлі)
- Cadillac Escalade
- Ferrari (усе мадэлі)
- Lamborghini (усе мадэлі)
- Land Rover Range Rover, Range Rover Sport
- Lexus LC*, LS*, LX*
- Maserati (усе мадэлі)
- McLaren (усе мадэлі)
- Mercedes-Benz AMG Е*, AMG S*, AMG SL*, AMG G*, AMG GT*, AMG GLE*, AMG GLS*, G*, GLE Coupe*, GLS*, S*, SL*, Maybach*
- Porsche (увесь мадэльны шэраг)
- Rolls-Royce (усе мадэлі)
- Toyota Land Cruiser 300, Sequoia
Сёлета патрабаванне выплаты павышанага падатку датычыць арганізацыяў. Фізасобы будуць плаціць яго ў 2025 годзе.
Раней паведамлялася, што шмат марак такіх аўтамабіляў ёсць у асабістым аўтапарку Аляксандра Лукашэнкі. Напрыклад, паведамлялася, што ў яго ўваходзяць «Mercedes-Maybach Pullman Guard» коштам ад 690 тысяч еўраў, «Maybach 62» (ад 367 тысяч), «Mercedes S W221» (ад 160 тысяч), «Audi A8 II» (ад 85 тысяч), «Mercedes GL» (ад 64 тысяч). Таксама ён карыстаўся такімі машынамі, як «Rolls-Royce Phantom Coupe» коштам ад 170 тысяч еўраў. Бачылі ў яго і аўтамабілі «Tesla», «Audi A8 III», «Geely Emgrand EV» ды іншыя транспартныя сродкі.
Якуб Хруст belsat.eu
