Даехаць да Менску з рэгіёнаў на маршрутках стала даражэй. Некаторыя перавозчыкі паднялі цэны яшчэ ў лістападзе, іншыя падымаюць цяпер, у снежні, піша Zerkalo.io.
З 3 лістапада вырасла цана праезду на маршрутцы Жодзіна – Менск. Цяпер квіток каштуе 5 рублёў, на 50 капеек больш, чым раней. Таксама на гэты ж маршрут падняў кошты аўтапарк №18 «Менаблтрансу».
З Барысава ў Менск цяпер можна даехаць за 7 рублёў.
Перавозчык stolica555, які працуе на маршруце Салігорск – Менск, з 1 снежня падвысіў цану праезду да 15 рублёў. Раней кошт складаў 14 рублёў.
Кампанія «Лидская стрела» з 21 снежня падыме кошт праезду з Ліды да Менску да 15 рублёў. Гэта на 2 рублі даражэй, чым было.
Фірма «Супербус» яшчэ 23 кастрычніка падняла кошт праезду з Дзяржынску да Менску да 3 рублёў.
Яшчэ ўвесну 2023 года пачаліся масавыя правяранні міжгародніх маршрутак, за нелегальны перавоз пасажыраў машыны пачалі адбіраць. Улетку з’явіўся праект указу, у якім было прапанавана ўвесці для кіроўцаў таксовак новыя патрабаванні і забараніць выкарыстанне праграмаў і рэсурсаў, серверы якіх не размяшчаюцца ў Беларусі.
14 лістапада Лукашэнка склікаў нараду аб пасажырскіх зносінах, наскардзіўся на перавознікаў-«нелегалаў» і загадаў узмацніць ім пакаранні, распрацаваць жорсткія правілы і да канца года адсправаздачыцца пра вынікі.
КДБ амаль адразу пасля гэтага распавёў пра выкрыццё злачыннай схемы з няўлічанымі перавозкамі і ўхіленнем ад падаткаў, «дарожныя войны» між маршрутнікамі. Крымінальную справу пачалі супраць больш як 20 чалавек. Справа шматгранная: яе пачалі за нясплату падаткаў, але ўвагу акцэнтуюць на бяспецы пасажыраў, а ў дзяржаўных медыях кажуць таксама пра «сабатаж і дыскрэдытацыю ўлады» і «шантаж мясцовай улады».
Прэтэнзіі ў сілавікоў узніклі найперш да праграмы-агрэгатару квіткоў «Атлас». У сюжэце каналу «Беларусь 1» аб крымінальнай справе за ўхіленне ад выплаты падаткаў у дачыненні да буйнога інтэрнэт-агрэгатару ў сферы пасажырскіх зносінаў «Аtlasbus» – у відэа яго называюць «бандай «чорных перавознікаў», сцвярджалася, што фігуранты справы – больш за 20 абвінавачаных і падазраваных – вялі свае справы пры дапамозе «шантажу, пагрозаў, сабатажу».
Марыя Міхалевіч belsat.eu