На мяжы з Літвой, на трасе М7 у 10 кіламетрах ад памежнага пераходу «Каменны Лог – Медзінінкай» усталяваны блокпост з танкам і БМП, паведамляе маніторынгавая група «Беларускі Гаюн».
На пасту нясуць службу ваеннаслужачыя 19 механізаванай брыгады, якія прыбылі ў Ашмянскі раён у рамках правярання баявой гатовасці Узброеных сілаў Беларусі.
Паводле інфармацыі Міністэрства абароны Беларусі, вайскоўцы «вырушылі з раёну засяроджвання ў баявыя парадкі» і «прыступілі да выканання вучэбна-баявых задач». Блокпост прыкрываюць замаскаваныя танк Т-72Б і баявая машына пяхоты БМП-2.
У тылу раёну праводзяцца заняткі па тактыка-спецыяльнай, тактыка-медычнай, інжынернай і тэхнічнай падрыхтоўкам, паведамляе Міністэрства абароны.
Пра догляд машын, якія праязджаюць праз блокпост, пакуль звестак не было.
11 сакавіка ў Беларусі пачалося правяранне баявой гатовасці злучэнняў і вайсковых частак Узброеных сілаў. Улады заяўляюць, што гэта адказ на вучэнні краінаў NATO «Steadfast Defender 2024», якія праходзяць у тым ліку на тэрыторыі Польшчы.
Падчас правярання можа быць абмежаваны рух цывільнага транспарту, папярэджвала Міністэрства абароны.
«Правяранне носіць комплексны характар. Асабоваму складу трэба будзе высунуцца ў прызначаныя раёны, правесці шэраг вучэнняў і трэнаванняў, у тым ліку з баявой стральбой», – адзначае Міністэрства абароны.
Сярод іншага ў хадзе правярання плануецца перамяшчэнне вайсковай тэхнікі, таму магчымае часовае абмежаванне руху цывільнага транспарту па дарогах агульнага карыстання і ўчастках мясцовасці.
На фоне вучэнняў прапагандысцкія тэлеграм-каналы пужаюць беларусаў і папярэджваюць, каб не здымалі вайсковай тэхнікі. А таксама заахвочваюць вайскоўцаў рабіць фота і відэа тых, хто будзе здымаць іх.
Таксама Міністэрства абароны Беларусі паведамляе, што ў хадзе правярання баявой гатовасці Узброеных сілаў у пункт прыёму асабовага складу прыбылі больш за 3000 ваеннаабавязаных.
Марыя Міхалевіч belsat.eu
