«Чорт з ім». Ілан Маск пастанавіў працягнуць фінансаванне інтэрнэту «Starlink» для Украіны
Бізнесовец Ілан Маск паведаміў, што ягоная кампанія працягне аплачваць інтэрнэт «Starlink» для Украіны. Пра гэта ён напісаў у сваім Twitter. «Украіна гэта цэніць», – адказалі ў Офісе прэзідэнта Зяленскага.
Амерыканскі бізнесовец Ілан Маск паведаміў, што, нягледзячы на буйныя выдаткі, ягоная кампанія працягне фінансаваць інтэрнэт «Starlink» для Украіны.
«Чорт з ім… Хоць «Starlink» усё яшчэ губляе грошы, а іншыя кампаніі атрымліваюць мільярды долараў ад падаткаплатнікаў, мы працягнем бясплатна фінансаваць урад Украіны», – напісаў Маск у сваім Twitter-акаўнце.
Дарадца кіраўніка Офісу прэзідэнта Украіны Міхаіл Падаляк адрэагаваў на гэтае паведамленне выразам з фантастычнага фільму «Зорныя войны».
«Ты мусіў знішчыць сітхаў. Ты гэтак і зрабіў. Дзякуй, што далучыўся да правільнага боку. Украіна гэта цэніць», – напісаў Падаляк у Twitter.
Днямі стала вядома, што Маск накіраваў ліст Пэнтагону з просьбай узяць на сябе фінансаванне спадарожнікавага інтэрнэту для Украіны. У звароце адзначалася, што на аплату паслугаў сёлета спатрэбіцца больш за 120 мільёнаў долараў, а налета – каля 400 мільёнаў долараў.
Раней Ілан Маск выклікаў абурэнне ўкраінцаў сваім «мірным планам», паводле якога Крым мае быць расейскім, а Украіна – нейтральнай дзяржавай.
Спадарожнікавы інтэрнэт «Starlink» запрацаваў ва Украіне ўвесну. Кампанія бясплатна перадала тысячы тэрміналаў для прыёму сігналу. Гэтыя захады моцна дапамагаюць ва ўмовах знішчэння інфраструктуры расейскімі вайскоўцамі.
Сяргей Крот belsat.eu
