Кіраўнік НАУ Павел Латушка даведаўся пра спрэчкі ў Менску аб вызваленні пяцёх палітвязняў
Павел Латушка сцвярджае, што ў Беларусі могуць вызваліць пяцёх палітвязняў. Пра гэта спрачаюцца цяперашнія ўлады ў Менску. Кіраўнік НАУ паведаміў газеце «Rzeczpospolita», што гаворка ідзе пра прадстаўнікоў польскай меншасці.
Кіраўнік Народнага антыкрызіснага ўпраўлення Павел Латушка паведаміў, што ў Беларусі трываюць спрэчкі пра вызваленне пяцёх палітвязняў. Паводле ягоных звестак, прыхільнікі такіх захадаў кажуць, што «уведзеныя Польшчай абмежаванні руху на мяжы, дзеянні Літвы, якая далучылася да іх, і перспектыва спынення грузавога чыгуначнага руху ствараюць пагрозу інтарэсам Беларусі». Таму ў Менску абмяркоўваюць крокі, якія б аслабілі гэты ціск, сказаў Латушка.
«Гэта ў тым ліку вызваленне пяці палітвязняў. Паводле нашай інфармацыі, гэта прадстаўнікі польскай меншасці», – паведаміў кіраўнік НАУ, не назваўшы імёнаў.
Нядаўна пытанне мусілі абмяркоўваць на нарадзе з удзелам кіраўніка адміністрацыі Аляксандра Лукашэнкі, дадаў Латушка.
Крыніцы выдання «Rzeczpospolita» у Менску кажуць, што вызваленне палітвязняў магчымае толькі ў выпадку прызнання віны: «У адваротным выпадку гэта выклікала б незадаволенасць некаторых сілаў. Ніхто не выходзіць з турмы, не папрасіўшы аб памілаванні».
Разважаючы пра асобу журналіста, актывіста незалежнага Саюзу палякаў Анджэя Пачобута, суразмоўца газеты адзначыў, што той «некалькі разоў адхіляў прапанову аб прызнанні віны, ён па-ранейшаму цвёрды і верны сваім перакананням».
«На жаль, настрой такі, што ўсе гатовыя цалкам закрыць мяжу», – кажа крыніца.
Абвастрэнне ў беларуска-польскіх дачыненнях пачалося пасля прысуду Пачобуту, яму прызначылі 8 гадоў калоніі ўзмоцненага рэжыму. Пасля гэтага Польшча закрыла памежны пераход «Баброўнікі–Бераставіца». Цяпер на мяжы працуе толькі два прапускных пункта ў Берасці: «Варшаўскі мост» для пасажырскага транспарту і «Казловічы–Кукурыкі» – для грузавога. У Польшчы не выключаюць поўнага закрыцця мяжы.
Сяргей Крот belsat.eu
