Следчы камітэт пагражае пераследам тым, хто далучыўся да праграмы дэмакратычных сілаў «Кадравы рэзерв для Новай Беларусі». Адпаведанае паведамленне з’явілася 14 лютага ў афіцыйным тэлеграм-канале.
У ведамстве заявілі, што далі «прававую ацэнку дзейнасці» прадстаўнікоў і ўдзельнікаў «Кадравага рэзерву для Новай Беларусі» паводле ч. 3 арт. 361-1 («Уваходжанне асобы ў склад экстрэмісцкага фармавання ў мэтах учынення злачынстваў экстрэмісцкай накіраванасці») Крымінальнага кодэксу Беларусі.
«Да выяўленых удзельнікаў, якія цяпер за мяжой, будзе ўжывацца працэдура спецыяльнай вытворчасці», – адзначылі ў СК.
«Кадравы рэзерв для Новай Беларусі» рэалізуецца пры садзейнічанні асноўных цэнтраў дэмакратычных сілаў Беларусі пад эгідай Аб’яднанага пераходнага кабінету. Мэта кампаніі – падбор і прафесійная падрыхтоўка грамадзянаў Беларусі для ўдзелу ў рэалізацыі рэформаў на ключавых пасадах у сферы дзяржаўнага і мясцовага кіравання на працягу пераходнага перыяду.
Удзельнікамі «Кадравага рэзерву» могуць стаць грамадзяне Беларусі, якія маюць адпаведны досвед і адукацыю для эфектыўнага выканання службовых абавязкаў у сферы дзяржаўнага адміністравання.
Кандыдаты атрымліваюць магчымасць узмацніць свае кампетэнцыі шляхам праходжання навучання, у тым ліку і стажаванняў, у цэнтральных і муніцыпальных органах улады шэрагу краін Еўрапейскага Звязу.
Якуб Хруст belsat.eu
