Онлайн-заяўка на шэнген і штрыхкод замест налепкі: Рада ЕЗ ухваліла візавую рэформу
Рада ЕЗ ухваліла некалькі пастановаў, што тычацца візавай рэформы. Калі змены набудуць моц, падавацца на шэнгенскую візу ў шмат якіх выпадках можна будзе онлайн, а асабістыя візіты ў консульствы не спатрэбяцца, паведамляецца на сайце Рады.
Выканальнік абавязкаў міністра ўнутраных справаў Іспаніі Фэрнанда Грандэ-Марляска Гомэс заявіў, што новыя правілы «стануць значным паляпшэннем як для грамадзянаў, гэтак і для працэсу разгляду заявак»:
«Гэта спросціць працэс падачы заявак для падарожнікаў і знізіць нагрузку на нацыянальныя адміністрацыі, якія змогуць рэагаваць больш хутка і эфектыўна».
Рада Еўразвязу ўхваліла сёння дзве пастановы, што тычацца лічбавізацыі візавай працэдуры. Будзе створаная адмысловая платформа для падачы заявак на шэнгенскую візу – там заяўнікі змогуць увесці ўсе неабходныя звесткі, запампаваць электронныя копіі пашпартоў і іншых неабходных дакументаў, а таксама аплаціць візавы збор.
Асабістыя візіты ў консульствы будуць у шмат якіх выпадках непатрэбнымі. Прыйсці давядзецца, калі віза афармляецца ўпершыню, калі сталіся несапраўднымі біяметрычныя звесткі і пасля замены пашпарта.
Візавых налепак больш не будзе – іх заменяць штрыхкоды з крыптаграфічным подпісам.
Найбліжэйшым часам ухваленыя пастановы будуць апублікаваныя ў афіцыйным часопісе Еўразвязу і набудуць моц. Дату, калі пачнуць дзеяць новыя правілы, вызначаць пасля завяршэння працы над візаваю платформай і лічбаваю візаю. Папярэдне запуск сэрвісу плануецца на 2026 год.
СК belsat.eu
