Дакументальны фільм «Святая вада» («Holy Water») рэжысёра Андрэя Куцілы і вытворчасці «Белсату» адзначаны прэміяй у польскім конкурсе «Dokument.pl».
Фільм «Святая вада» зняты 19 студзеня ў Кіеве, за 36 дзён да поўнамаштабнага ўварвання Расеі ва Украіну. Працу ўзнагародзілі за «незвычайную інтуіцыю, якая дазволіла нам стаць сведкамі і пашырыць погляд на шлях гісторыі, які бязлітасна разгортваецца».
Аўтар паказаў, як святкуюць Вадохрышча ў адным з раёнаў Кіева. Традыцыйна ў гарадскім возеры робяць палонку, каб акунуцца ў ваду.
У «Святой вадзе» захавана тое, як людзі становяцца ў чаргу да палонкі. На беразе чутны звон званоў праваслаўнай царквы. Буйным планам паказаныя людзі розных узростаў. Яны трохі перагаворваюцца і спакойна сустракаюць адно з самых важных святаў у праваслаўных вернікаў. Праз гэтыя вобразы аўтар расказвае пра хісткасць жыцця, супярэчлівасць чалавечай веры і радасць існавання.
Фільм атрымаў у Італіі прэмію «PerSo Short» і адмысловую згадку «PerSo Short Jail», а таксама ўзнагароджаны на польскім конкурсе «Festiwal Mediów. Człowiek w Zagrożeniu».
Пакуль стужка дасяжная толькі на фестывалях. Пазней яна з’явіцца на нашым YouTube-канале «Белсат.DOC».
Арсен Рудэнка