Найпапулярнейшым фільмам летась у Менску стаўся расейскі «Чабурашка», а беларуская прапагандысцкая стужка «На другім беразе» заняла чацвёртае месца. Пра гэта на прэс-канферэнцыі паведаміла намесніца кіраўніка Менскага кінавідэапракату Вольга Дзюльдзя. Яна не раскрыла касавыя зборы, спаслаўшыся на «камерцыйную таямніцу», і агульны лік гледачоў.
Топ-5 самых папулярных фільмаў летась у сталіцы выглядае так:
Вынікі 2023 года на прэс-канферэнцыі агучыла намесніца генеральнага дырэктара Менскага кінавідэапракату Вольга Дзюльдзя. Яна адмовілася раскрыць касавыя зборы кінатэатраў, сказаўшы, што гэта – «камерцыйная таямніца».
Акрамя таго, Дзюльдзя не назвала агульны лік гледачоў, паведаміўшы толькі, што сеансы беларускага кіно – гульнявога, дакументальнага і анімацыйнага – наведалі больш за 170 тысячаў асобаў:
«Адбылося 786 сеансаў беларускага кіно ў гульнёвай форме, 609 сеансаў у негульнёвай форме і 460 сеансаў анімацыі, якія наведалі больш за 170 тысяч гледачоў. Усе зборы з’яўляюцца камерцыйнай таямніцай прадпрыемства».
У 2022 годзе менскія кінатэатры наведалі каля 800 тысячаў гараджанаў, у тым ліку сеансы беларускага кіно – 100 тысячаў.
Вольга Дзюльдзя канстатавала, што цяпер у афішы бракуе 3D-стужак:
«Да нас паступаюць перыядычна пытанні з нагоды фармату 3D, чаму не паказваем фільмы. Ёсць попыт, але на цяперашні момант у нас няма прапаноў ад дыстрыбʼютараў з гэтым фарматам. Як толькі маюцца, мы адразу паказваем».
У планах на сёлета – паказ беларуска-узбекскай стужкі «Казбек», фільму «Чорны замак» паводле Уладзіміра Караткевіча і мультфільму «Песня Сірын».
З расейскіх прэм’ераў чакаюцца вайсковая драма «Паветра», экранізацыя рамана Міхаіла Булгакава «Майстар і Маргарыта», экранізацыя сказкі «Лятучы карабель», працяг спартовай драмы «Лёд», «Анегін» паводле Аляксандра Пушкіна, «Сто гадоў таму наперад» паводле Кіра Булычова, мультфільм «Фініст. Першы асілак», фэнтэзі «Чараўнік Смарагдавага гораду».
Дзюльдзя паабяцала, што сёлета менчукі пабачаць таксама галоўныя сусветныя кінапрэм’еры:
«Мы працуем з усімі навінкамі сусветнага кінематографу. Вядома, мы чакаем «Дзюну» другую частку, мы будзем яе паказваць. Мы чакаем «Паляўнічых за прывідамі» і «Прыгоды Падынгтана», і «Галаваломку-2», і «Гарфілда». Мы ўсё гэта чакаем, мы ўсё гэта пакажам, вядома. Усе сусветныя прэмʼеры па-ранейшаму выходзяць у сетцы нашых кінатэатраў. Нічога не змянілася».
Яна не растлумачыла, якім чынам заходнія кінанавінкі трапляюць у Беларусь ва ўмовах, калі буйныя галівудскія студыі адмовіліся ад супрацы з Расеяй. Менавіта праз Маскву нашая краіна атрымлівала прэм’еры з агучваннем на расейскай мове.
Летась беларуская дзяржава легалізавала крадзеж «аб’ектаў інтэлектуальнай уласнасці з несяброўскіх краінаў», такім чынам, цяпер афіцыйна дазволена паказваць, напрыклад, фільмы і тэлетрансляцыі без згоды праваўладальнікаў.
Сцяпан Кубік belsat.eu