Кіраўнік САЗ: Праз зніжэнне тэмпаў барацьбы з COVID-19 можа з'явіцца новы смяротны вірус
Кіраўнік Сусветнай арганізацыі аховы здароўя Тэдрас Гэбрэесус заявіў, што прабелы ў стратэгіях барацьбы з COVID-19 сёлета працягваюць ствараць ідэальныя ўмовы для з’яўлення новага смяротнага варыянту віруса, паколькі ў некаторых частках Кітаю назіраецца рост колькасці інфекцыяў, перадае «Reuters».
Пра гэта генеральны дырэктар САЗ заявіў усяго праз некалькі месяцаў пасля таго, як сказаў, што свет цяпер у найлепшай сітуацыі для спынення пандэміі.
«Мы значна бліжэй да таго, каб сказаць, што надзвычайная фаза пандэміі скончылася, але яна яшчэ не наступіла», – сказаў Тэдрас Гэбрэесус 2 снежня і дадаў, што «прабелы ў тэставанні і вакцынацыі працягваюць ствараць ідэальныя ўмовы для з’яўлення новага варыянту, які можа прывесці да значнай смяротнасці».
Паводле ацэнак САЗ, каля 90 % насельніцтва Зямлі маюць пэўны ўзровень імунітэту да каронавіруса або таму, што перахварэлі, або праз вакцынацыю.
Аднак у Кітаі пачаўся рост інфекцыі COVID-19 і цяпер застаецца на рэкордна высокім узроўні. Таксама заўважаны рост у некаторых частках Вялікай Брытаніі пасля некалькіх месяцаў спаду.
На фоне жорсткіх ковідных абмежаванняў, калі людзі тыднямі не маглі выходзіць з дому, у розных частках Кітаю прайшлі масавыя пратэсты, пасля чаго ўлады вырашылі змякчыць антыковідную палітыку. Стыхійныя маніфестацыі адбываліся ў сталіцы краіны Пекіне, найбуйнейшым горадзе Кітаю Шанхаі і некаторых іншых гарадах.
Алена Рувіна belsat.eu
