Суд Жлобінскага раёна 1 лютага вынес чарговы прысуд за падзеі жніўня 2020 года. Мясцовага жыхара Алега Пайташа судзілі паводле ч.1 арт. 342 («Арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх») Крымінальнага кодэксу.
Пра гэта паведамляе ПЦ «Вясна».
Алега Пайташа затрымалі 14 кастрычніка 2021 года, да суду ён утрымліваўся ў СІЗА г. Гомеля.
Па матэрыялах абвінавачання, Алег Пайташ 9 жніўня 2020 года ўдзельнічаў у акцыі пратэсту, выходзіў на праезную частку, станавіўся ў счэпку, замінаў руху грамадскага транспарту, хлопаў у далоні, крычаў, свістаў, выкрыкваў лозунгі «Міліцыя з народам!» Той жа ноччу яго затрымалі супрацоўнікі міліцыі, а суд пакараў у адміністратыўным парадку.
Суддзя Мікалай Сяргеевіч пастанавіў пакараць Пайташа абмежаваннем волі з накіраваннем ва ўстанову адкрытага тыпу тэрмінам на адзін год і шэсць месяцаў.
РР belsat.eu
