#ПАВЕЛ КАЛАВУР

Беларускія банкі актыўна выдавалі крэдыты расейскім кампаніям. Вынікам гэтага магла стаць адстаўка старшыні Нацыянальнага банку Паўла Калавура. Ён або гэтаму не супрацьстаяў, кажуць медыі, або, наадварот, змагаўся з гэтым, адзначаюць палітыкі. Ці сапраўды гэтыя крэдыты сталіся такою важнаю праблемаю для беларускай эканомікі? А можа, звальненне старшыні Нацбанку мела іншыя прычыны?

Кіраваць Нацбанкам будзе экс-прэм’ер, які не мае досведу ў банкаўскай сферы. Ці стане горш, чым было за прафесійным банкірам? Спыталі эканаміста Льва Львоўскага, чаго дасягнуў Калавур і чаго чакаць ад Галоўчанкі.

Шмат хто з беларусаў памятае «прыкмету», звязаную з колішнім старшынём праўлення Нацбанку Пятром Пракаповічам: калі той казаў, што «дэвальвацыі не будзе», трэба было бегчы ў абменнік купляць долары. Павел Калавур такім не запомніцца, і наўрад ці запомніцца звычайнаму беларусу хоць нечым. А для такой пасады гэта ўжо вялікае дасягненне: было адносна стабільна.