Галоўная рада непрызнаванага беларускімі ўладамі Саюзу палякаў Беларусі (СПБ) прыняла заяву, у якой асуджаецца дыскрымінацыя арганізацыяў, што ўваходзяць у СПБ, піша znadniemna.pl.
«Галоўная рада зафіксавала шматлікія факты блакавання або абмежаванні статутнай дзейнасці СПБ органамі дзяржаўнай улады і кіравання Рэспублікі Беларусь», – гаворыцца ў заяве Саюзу палякаў.
Гаворка ідзе пра шэраг сітуацыяў, якія мелі месца ў апошнія месяцы, у тым ліку перашкоды ў арганізацыі святкавання стагоддзя незалежнасці Польшчы. Летась СПБ тройчы адмовілі ў памяшканні, а пасля гвалтоўна перарвалі святочны канцэрт.
«Мы ўспрымаем гэтыя інцыдэнты як дыскрымінацыю ў дачыненні да польскай меншасці, якая жыве на тэрыторыі Беларусі і асуджаем негатыўнае стаўленне беларускіх уладаў да грамадскай актыўнасці грамадзянаў Рэспублікі Беларусі польскай нацыянальнасці», – гаворыцца ў заяве СПБ, аднагалосна прынятай на паседжанні ў Горадні.
СПБ спадзяецца, што «польска-беларускі дыялог» палепшыць сітуацыю вакол польскай меншасці, а таксама прывядзе да легалізацыі Саюзу палякаў, які з’яўляецца найбуйнейшай і самай уплывовай арганізацыя польскай меншасць у Беларусі.
«Дыскрымінацыйныя дзеянні з боку беларускіх уладаў і іншых інстытуцыяў з’яўляюцца парушэннем правоў польскай меншасці, якія гарантуюцца Канстытуцыяй Беларусі», – адзначыла падчас паседжання кіраўніца СПБ Анджэліка Борыс.
У Беларусі дзейнічае больш за 100 пляцовак непрызнаванага беларускімі ўладамі Саюзу палякаў. Арганізацыя налічвае больш за 10 000 сябраў. Летась СПБ адзначыў сваё 30-годдзе.
ЮВ,pj, belsat.eu, паводле PAP
