Нацбанк павысіў разліковыя велічыні стандартнай рызыкі (РВСР), якія будуць дзеяць у снежні. На гэтыя лічбы павінны арыентавацца банкі, калі выстаўляюць адсоткавыя стаўкі для крэдытаў, РВСР нельга перавышаць. Рашэнне можа спрыяць павышэнню ставак па крэдытах.
На снежань РВСР для фізічных асобаў будзе на ўзроўні 15,25 % (цяпер – 14,61 %), а для юрыдычных асобаў – 10,99 % (цяпер – 10,82 %).
Да гэтага Нацбанк цягам 5 месяцаў утрымліваў на адным і тым жа ўзроўні паказнікі стандартнай рызыкі. Перад тым з пачатку года рэгулятар паслядоўна зніжаў РВСР.
Разліковыя велічыні стандартнай рызыкі ўскосна ўплываюць на кошт крэдытаў. Банкі, якія перавышаюць РВСР, павінны выконваць павышаныя рэгулятарныя патрабаванні ў галіне дастатковасці капіталу, фармавання спецыяльных рэзерваў на пакрыццё магчымых стратаў і фармавання фонду абавязковых рэзерваў.
Нагадаем, у Беларусі цяпер назіраецца крэдытны бум. Гэтым занепакоены Нацбанк, бо ў некаторых пазычальнікаў узнікаюць праблемы з пагашэннем крэдытаў у выніку празмернай пазыковай нагрузкі.
СП, belsat.eu