Уладзімір Зяленскі заявіў, што гатовы весці перамовы асабіста з Пуціным. Аб гэтым ён заявіў сёння перад удзельнікамі эканамічнага форуму ў Давосе, паведамляе «Голас Амерыкі». Прэзідэнт Украіны выказаў меркаванне, што ў дадзеных абставінах перамовы можна весці толькі з Пуціным асабіста.
Зяленскі адзначыў, што цяпер перамовы з Расеяй немагчымыя і іх трэба весці з пэўнымі ўмовамі толькі з прэзідэнтам Расеі Уладзімірам Пуціным.
«Дзейны прэзідэнт Расейскай Федэрацыі не ўсведамляе да канца, што адбываецца. Мне здаецца, што ён жыве ў сваім інфармацыйным свеце, не разумеючы, што Украіна нікуды не збіраецца і не пойдзе на саступкі. Мы змагаемся на сваёй зямлі, і, яшчэ раз падкрэсліваю, гэта вайна Украіны не супраць кагосьці, а за – за сваю зямлю і на сваёй зямлі, за сваю свабоду і дакладна за сваю будучыню», – заявіў Уладзімір Зяленскі.
Зяленскі адзначыў, што Пуцін павінен вярнуцца ў рэальнасць, а ягонае атачэнне павінна яму дапамагчы выйсці з ягонай інфармацыйнай нерэальнасці, якую яны сабе пабудавалі цягам шматлікіх гадоў.
Зяленскі выказаўся на конт магчымасці перамоў з Пуціным.
«Размаўляць з пасярэднікамі няма ніякага сэнсу. Яны ніхто, іх нават няма на гэтай шахматнай дошцы. Яны не фігуры. Яны проста прысутныя ў нейкім паветры. Ёсць адзін чалавек – прэзідэнт Расейскай Федэрацыі. Калі ён будзе гатовы выйсці ў рэальнасць. Калі ён толькі трапіць у рэальнасць, ён зразумее, што шмат людзей гіне, што гінуць невінаватыя людзі. Калі ён здольны нешта зразумець, тады ён дакладна зразумее, што трэба размаўляць і сканчаць вайну, якую ён распачаў», – адзначыў Зяленскі.
Уладзімір Зяленскі лічыць, што толькі пасля гэтага з’явіцца магчымасць дыпламатычных перамоў з дзейнай уладай.
Нагадаем, што апошні раз Расея і Украіна праводзілі перамовы 29 сакавіка ў Стамбуле. Пасля таго, як 12 красавіка былі выяўлены забойствы цывільных жыхароў у Бучы пад Кіевам Уладзімір Пуцін сказаў, што перамовы зайшлі ў тупік. 19 красавіка фактычнае іх замарожванне канстатавалі і ўкраінскія ўлады.
Раман Лугоўскі belsat.eu
