Міністр абароны Турцыі: Вываз украінскага збожжа працягнецца пад турэцкім сцягам
Судны пад турэцкім сцягам працягнуць вывозіць украінскае збожжа з партоў пасля заявы Расеі аб выхадзе са збожжавай здзелкі. Аб гэтым заявіў міністр абароны Турцыі Хулусі Акар, паведамляецца на афіцыйным сайце турэцкага вайсковага ведамства.
Паводле заявы міністра абароны Турцыі Хулусі Акара, якую ён зрабіў увечары 1 лістапада, Турцыя працягне вывозіць украінскае збожжа пасля выхаду Расейскай Федэрацыі з пагаднення. Па дамове Масква гарантавала бяспечны праход суднаў са збожжавымі грузамі з раней заблакаваных чарнаморскіх партоў.
«Мы лічым, што падпісанае пагадненне выгаднае для ўсіх бакоў і яго парушэнне будзе праблемай для кожнага з бакоў. Мы хочам прадоўжыць транспарціроўку збожжа, і мы будзем укладваць у гэта сваю частку», – адзначыў Хулусі Акар.
Турэцкі міністр таксама паведаміў, што Стамбул меў адпаведныя размовы з Украінай і Расеяй. Расейскі міністр абароны Сяргей Шайгу, у сваю чаргу, паабяцаў перадаць прадстаўленую інфармацыю свайму кіраўніцтву.
«Мы нагадалі нашым суразмоўцам, што выхаду з пагаднення быць не можа. Рух у гэтым напрамку працягваецца. Мы ацэньваем наяўныя дадзеныя таго, што пагадненне будзе працягвацца», – падкрэсліў Акар, адзначыўшы, што спадзяецца на беспраблемны экспарт украінскага збожжа.
Адказваючы 1 лістапада на пытанне журналіста аб апошнім стане судоў, загружаных пасля таго, як Расея заявіла аб прыпыненні збожжавага калідору, міністр абароны Турцыі сказаў:
«Па стане на ўчорашні дзень караблі, якія выйшлі з украінскіх партоў і рухаюцца па моры, працягваюць свой шлях. Праблем выхаду судоў пад турэцкім сцягам няма. Яны і надалей будуць выходзіць».
Акар таксама паведаміў, што з пачатку рэалізацыі збожжавай дамовы больш за 10 мільёнаў тон украінскага збожжа «было адпраўлена тым, хто мае патрэбу». Паводле яго ацэнкі, спыненне транспарціроўкі збожжа выклікае «сурʼёзныя праблемы голаду ў краінах, якія развіваюцца, рост коштаў і ў выніку пагаршэнне палітычнай стабільнасці». Адразу пасля падпісання пагаднення адбылося сурʼёзнае зніжэнне і палягчэнне коштаў на збожжа.
Раней паведамлялася, што 29 кастрычніка Расея заявіла аб прыпыненні збожжавай дамовы, а 31 кастрычніка – аб прыпыненні праходу суднаў са збожжам.
Антон Тачняк belsat.eu
