Палітзняволенаму журналісту, чальцу незалежнага Саюзу палякаў Беларусі Анджэю Пачобуту не перадаюць лекі ад сэрца.
Як паведаміла жонка журналіста Аксана Пачобут, на мінулым тыдні Анджэй праз адваката папрасіў перадаць яму лекі. У чацвер, 27 траўня, іх даставілі ў СІЗА Жодзіна. Аднак у гэты панядзелак, 31 траўня, ён зноўку перадаў сваю просьбу. Аксана хвалюецца, ці дойдуць лекі да мужа, бо ён мае праблемы з сэрцам: збіваецца рытм, таму лекі жыццёва неабходныя.
Анджэй Пачобут – адзін з пяці лідараў польскай меншасці ў Беларусі, арыштаваных у сакавіку беларускімі спецслужбамі паводле так званай «справы палякаў».
Сёння стала вядома, што трох палітзняволеных актывістак СПБ – Ірэну Бярнацкую, Марыю Цішкоўскую і Ганну Панішаву – вывезлі з СІЗА ў Польшчу. Польскае МЗС заявіла, што гэта адбылося яшчэ 25 траўня, але сваякі затрыманых нічога не ведалі. Вярнуцца ў Беларусь жанчыны не змогуць.
Паводле інфармацыі дырэктаркі «Белсату» Агнешкі Рамашэўскай-Гузы, Анджэю Пачобуту таксама прапаноўвалі дэпартацыю, аднак ён катэгарычна адмовіўся і застаецца за кратамі. У сваіх лістах да жонкі ён піша, што вытрымае ўсё, што яго чакае. Дзе зараз знаходзіцца Анджаліка Борыс – пакуль дакладна невядома.
У сакавіку Генеральная пракуратура распачала крымінальную справу супраць старшыні Саюзу палякаў у Беларусі Анджэлікі Борыс ды іншых лідараў польскай меншасці, сярод якіх журналіст Анджэй Пачобут, дырэктарка грамадскай школы пры СПБ у Ваўкавыску Марыя Цішкоўская, заснавальніца і дырэктарка «Форуму польскіх лакальных ініцыятыў» Ганна Панішава, кіраўніца лідскай філіі СПБ Ірэна Бярнацкая.
Іх абвінавацілі ў распальванні нацыянальнай варожасці. Падставаю сталі гістарычныя і культурніцкія імпрэзы, якія ладзіліся цягам апошніх трох гадоў. Санкцыя крымінальнага артыкула, паводле якіх іх абвінавачваюць, прадугледжвае ад 5 да 12 гадоў пазбаўлення волі. Усіх пяцёх арыштаваных паводле «справе палякаў» праваабаронцы прызналі палітычнымі зняволенымі. Яны знаходзіліся пад вартай: спачатку ў СІЗА на Валадарскага ў Менску, затым – у СІЗА Жодзіна.
ВК, “Белсат”