Затрыманы 75-гадовы віцебскі актывіст Барыс Хамайда, паведамляе «Наша Ніва». Вядома, што мужчыну затрымалі памежнікі пасля таго, як пабачылі ягоны пашпарт з выявай Пагоні на вокладцы.
Паведамляецца, што Барыс Хамайда 28 ліпеня ехаў у Бігосава, дзе хацеў далучыцца да пешай пілігрымкі ў Росіцы (вёска ў Верхнядзвінскім раёне, якая знаходзіцца недалёка ад латвійскай мяжы). Там праходзяць урачыстасці да 80-й гадавіны мучанікаў Другой сусветнай вайны.
Бігосава – гэта апошні чыгуначны прыпынак на беларускім памежжы з Латвіяй, побач знаходзіцца пункт пропуску «Грыгароўшчына – Патэрніекі».
Памежнікі хадзілі па цягніку і правяралі пашпарты. Тады яны ўбачылі, што ў Хамайды вокладка з выявай Пагоні. Спачатку памежнікі паразмаўлялі з ім на агульныя тэмы, а як ён выйшаў у Бігосаве на перон, дагналі і затрымалі.
Мужчыну завезлі ў Верхнядзвінск.
Мінулы раз найстарэйшага віцебскага апазіцыянера Хамайду затрымлівалі ў жніўні мінулага года, на яго склалі пратакол за несанкцыянаванае пікетаванне. Падставаю стаўся медальён з Пагоняй, які спадар Хамайда адмовіўся зняць, калі на гэтым пачалі настойваць міліцыянты. Мужчыну затрымалі ў будынку суду Кастрычніцкага раёну Віцебску, куды той прыйшоў падтрымаць журналістку Таццяну Мацвееву. Яго адпусцілі пасля ночы ў ІЧУ.
Алена Рувіна belsat.eu