Расейцы выкарысталі малюнак мастака Уладзіміра Цэслера для антываеннай акцыі ў Чэхіі. У беларускай дыяспары некаторыя абурыліся і сталі цікавіцца, ці атрымалі арганізатары дазвол на адаптацыю арыгінальнага твора. Сам Цэслер сказаў «Белсату», што не супраць: «Змагаемся за адное і тое ж».
Бела-сіне-белай візуалізацыяй расейцаў у Чэхіі заклікалі на акцыю на гадавіну пачатку вайны ва Украіне. На банеры – адаптацыя малюнка беларускага мастака і дызайнера Уладзіміра Цэслера. Арыгінальны твор «Флаг – Плакат» ён апублікаваў у сваім Instagram у кастрычніку 2020 года.
Акцыю ладзіў Пражскі расейскі антываенны камітэт. Яна прайшла пад лозунгам «Перамога – Украіне, мір – Еўропе, дэмакратыя – Расеі». Аўтарства Цэслера было пазначана на Facebook-старонцы з запрашэннем на мітынг.
У беларускай дыяспары ў Чэхіі некаторыя абурыліся:
«Перафарбаванне бчб-сцяга для расейскай акцыі бачыцца абразлівым прыкладам апрапрыяцыі. Я лічу, што беларускія актывісты могуць аб’ядноўвацца з расейскім антыпуцінскім ды антываенным рухам, бо мэты ў нас часткова супадаюць. Але такі крадзеж страшна мяне абурыў.
«Не магу такой жа гісторыі ўявіць каб, напрыклад, расейцы ўзялі за аснову сцяг Украіны і пакінулі блакітны, а жоўты памянялі на белы – ім бы такога не дазволілі. Баюся, што потым будуць пісаць пра падабенства «сястры і брата» народаў Беларусі і Расеі, маўляў, у іх і сцягі амаль падобныя».
«Хай бы нешта сваё ўжо зрабілі. Лічу, расейцы павінны самі сваё прыдумваць і арганізоўваць».
«Яны ідуць нашым шляхам замест таго, каб абраць свой».
Праўда, ёсць і іншыя меркаванні:
«Гэта добра, што беларусаў капіююць».
«Асабіста ў мяне дыскамфорту не выклікае. Хутчэй наадварот: беларускі пратэст натхняе расейскі пратэсны рух, і гэта файна».
«Асабіста я не пакрыўдзілася б, калі б мой плакат ужылі без майго дазволу. Мне было б, наадварот, прыемна».
«Калі гэта было зроблена з дазволу аўтара, то ў мяне няма ніякіх прэтэнзіяў. Гэта ж добра, калі наш шлях натхняе іншых».
Уладзімір Цэслер сказаў «Белсату», што даў дазвол на выкарыстанне свайго малюнка. Пра гэта ён дамовіўся з расейскім калекцыянерам, галерыстам і публіцыстам Маратам Гельманам:
«Я рабіў бел-чырвона-белы, а яны зрабілі бела-сіне-белы. Увогуле, паколькі мы змагаемся за адное і тое ж – няхай».
Цэслер адзначыў, што не бачыць тут нагоды для сварак: «Калі б гэта зрабіў Пуцін – гэта іншая справа».
Арганізатар акцыі ў Празе, расейскі палітык і журналіст Дзяніс Білуноў, запэўніў, што ўзгадняў дызайн банера з берлінскай групай антываеннага руху, якая, у сваю чаргу, атрымала дазвол ад аўтара.
Сяргей Крот belsat.eu