«Ні сумленныя, ні свабодныя». Як у свеце рэагуюць на «выбары» дэпутатаў у Беларусі
У Беларусі 25 лютага прайшлі так званыя выбары дэпутатаў Палаты прадстаўнікоў і мясцовых Саветаў дэпутатаў. Лідарка дэмсілаў Святлана Ціханоўская адзначыла, што выбары не адпавядаюць дэмакратычным стандартам і нагадваюць ваенную аперацыю супраць уласных грамадзянаў. Яна заклікала міжнародную супольнасць не прызнаваць гэтыя выбары. «Белсат» даведаўся, якою была рэакцыя ў свеце. Часта гэта асуджэнне, але знайшліся і плакаты ў падтрымку Аляксандра Лукашэнкі.
«Фальшывыя выбары ў Беларусі нікога не падманваюць»
АБСЕ падкрэсліла, што выбары «прайшлі ў атмасферы страху, у якой ні адзін выбарчы працэс нельга назваць дэмакратычным».
«Рэжым зноў не дазволіў АБСЕ назіраць за выбарамі. Мы заклікаем рэжым Лукашэнкі спыніць рэпрэсіі, вызваліць усіх палітычных зняволеных і пачаць дыялог са сваімі палітычнымі апанентамі. Беларускі народ заслугоўвае лепшага», – піша АБСЕ.
Дзярждэп ЗША назваў выбары фіктыўнымі.
«Рэжым па-ранейшаму ўтрымлівае больш за 1400 палітычных зняволеных. <…> Беларусы, якія знаходзяцца за мяжой, маглі галасаваць толькі ў выпадку вяртання ў Менск, дзе іх, хутчэй за ўсё, чакалі б рэпрэсіі. Гэтыя злоўжыванні фактычна замарозілі сапраўдную палітычную дзейнасць і палітычны дыскурс унутры Беларусі.
Злучаныя Штаты прызнаюць сілу, стойкасць і мужнасць грамадзянскай супольнасці і дэмакратычнага руху Беларусі, якія патрабуюць права голасу ў вызначэнні будучыні сваёй краіны», – піша прэс-служба Дзярждэпу.
Міністр Вялікай Брытаніі ў справах Еўропы Леа Дочэрці таксама выказаў асуджэнне.
«Напярэдадні выбараў назіралася абуральнае запалохванне і чарговая хваля рэпрэсіяў і арыштаў. Шакуе той факт, што пераследам падвергліся сем’і палітвязняў, якія ўжо перажылі траўму ад таго, што іх блізкія былі затрыманыя за ажыццяўленне асноўных свабодаў.
Рэжым здушыў сапраўдныя апазіцыйныя партыі і адмовіўся запрасіць незалежных назіральнікаў АБСЕ на выбары. Гэтыя дзеянні ідуць насуперак міжнародным абавязальніцтвам Беларусі і дэманструюць відавочнае імкненне пазбегнуць празрыстасці выбарчага працэсу», – заявіў Дочэрці.
Прэзідэнт Парламенцкай асамблеі NATO Міхал Шчэрба падкрэсліў, што рэжым Лукашэнкі спрабуе ў чарговы раз заглушыць жаданне і права беларускага народу выказаць сваю волю праз свабодныя і сумленныя выбары
«Фальшывыя выбары ў Беларусі нікога не падманваюць: яны бессэнсоўныя», – піша Шчэрба.
Шмат падтрымкі дэмсілаў і плакат за Лукашэнку
Дэпутат нямецкага Бундэстагу, сімвалічны «хросны» палітвязняў Ігара і Дарʼі Лосікаў Робін Вагенэр распавёў, што група «Дэмакратычная Беларусь» у Бундэстагу цвёрда падтрымлівае Святлану Ціханоўскую і дэмакратычныя сілы ў Беларусі.
«Псеўдавыбары, учыненыя дыктатарам Лукашэнкам 25 лютага 2024 года, гэтага не зменяць. Як і сфальсіфікаваныя прэзідэнцкія выбары летам 2020 года, гэтыя “выбары” не зʼяўляюцца ні сумленнымі, ні свабоднымі», – заявіў ён.
Ён таксама асудзіў рэпрэсіі і нагадаў, што напярэдадні выбараў у Беларусі ў зняволенні загінуў палітвязень Ігар Леднік.
Міністэрства замежных справаў Нямеччыны мяркуе, што рэжым Лукашэнкі баіцца.
«Мы рашуча асуджаем сістэмныя рэпрэсіі вакол выбараў у Беларусі. Рэжым Лукашэнкі выкарыстоўвае ўсе даступныя сродкі для задушэння дэмакратычных памкненняў народу Беларусі. Ён пераканаўся ў іх сіле – і гэтая сіла працягвае палохаць рэжым», – піша МЗС Нямеччыны.
Міністэрства замежных справаў Аўстрыі таксама асудзіла тое, што адбываецца ў Беларусі, і выступіла з падтрыманнем дэмсілаў:
«Мы працягнем працаваць дзеля свабоднай, незалежнай і квітнеючай Беларусі».
Затое ў Сербіі захацелі падтрымаць Лукашэнку, хоць выбары і парламенцкія. Гэта заўважыў аналітык Інстытуту новай Еўропы (Польшча) Якуб Белямовіч:
«У Бялградзе крайні правы “Кансерватыўны рух НАШЫ” развесіў плакаты ў падтрымку аўтарытарнага лідара Беларусі Аляксандра Лукашэнкі напярэдадні парламенцкіх “выбараў” у Беларусі, якія адбудуцца 25 лютага».
Не забыліся пра Беларусь і ва Украіне.
«Міжсеткавае абʼяднанне “За дэмакратычную Беларусь!” заклікае міжнародную супольнасць не прызнаваць легітымнасць так званых “выбараў” і выкарыстоўваць усе даступныя інструменты для таго, каб Лукашэнка апынуўся за кратамі», – распавяла дэпутат Вярхоўнай Рады Украіны Ірына Герашчанка.
А дэпутат парламенту Францыі Фрэдэрык Пэці назваў выбары ў Беларусі пародыяй і заклікаў МЗС Францыі не прызнаваць іх.
Арсен Рудэнка belsat.eu
