Генеральны пракурор Андрэй Швед, выступаючы перад студэнтамі БДУ з прапагандысцкай прамовай, заявіў, што ў 2020 годзе на вуліцах Беларусі «дзейнічала баявое крыло з неанацыстаў». Пра гэта піша БелТА.
Як заявіў Швед студэнтам БДУ, у 2020 годзе ў Беларусі была спроба арганізаваць каляровую рэвалюцыю.
«Калі ж мы сталі аналізаваць матэрыялы першых крымінальных справаў, звязаных са спробай дзяржаўнага перавароту і экстрэмізмам (нагадаем, у апошнія гады слова «экстрэмізм» прадстаўнікі рэжыму Лукашэнкі выкарыстоўваюць выключна для абазначэння любых праяваў іншадумства – заўв. «Белсат»), мы ўбачылі, што на вуліцах дзейнічала баявое крыло з неанацыстаў», – падкрэсліў Генеральны пракурор.
«Гэтая сітуацыя выклікала здзіўленне. Няўжо ў нашай Беларусі ёсць неанацысты? Высветлілася, што так. Да снежня 2020 года ўжо было каля сотні абвінавачаных паводле крымінальных справаў, якія адкрыта прапагандавалі сваё пазітыўнае стаўленне да фашызму і нацызму, да самой ідэі, якая, здавалася нам, у 1945 годзе была знішчаная.
Стала відавочным, што неанацызм, на жаль, засеў у галовах пэўнай часткі моладзі», – заявіў Швед.
Таму, паводле Генпракурора, улады вырашылі звярнуцца да тэмы Вялікай Айчыннай вайны і распачаць крымінальную справу «Аб генацыдзе». Як заявіў Швед, «вынікамі следства пацвярджаецца тэза, што нацызм жывы» і з’яўляецца «ідэалагічнай платформай і часткай дзяржаўнай палітыкі ЗША і Еўразвязу ў адносінах да Беларусі».
Вядома, што ўлады цяпер выкарыстоўваюць тэму Другой сусветнай вайны і абвінавачванні ў «неанацызме» ў прапагандысцкіх мэтах, каб распальваць нянавісць да праціўнікаў рэжыму Аляксандра Лукашэнкі і апраўдваць масавыя рэпрэсіі ў Беларусі.
Паняцці «распаўсюд нацысцкай сімволікі» і «рэабілітацыя нацызму» трактуюцца сілавікамі і судамі надзвычай шырока. Напрыклад, у 2021 годзе віцебскага краязнаўца Віктара Барысенкава пакаралі 7 соднямі адміністратыўнага арышту за публікацыю архіўнага фотаздымка часоў Другой сусветнай вайны.
У 2023 годзе ў Пінскім раёне быў затрыманы мясцовы жыхар, які публікаваў чорна-белыя гістарычныя фатаграфіі, на якіх прысутнічала свастыка, а таксама паставіў на аватар у Telegram эмблему батальёна «Азоў», які ўваходзіць у склад ЗСУ.
Нібыта за «рэабілітацыю нацызму» былі асуджаныя палітвязні Мікіта Бруй (стрыечны праўнук Якуба Коласа) і Аляксандр Румко.
Вінавацілі ў «рэабілітацыі нацызму» таксама мастака Алеся Пушкіна, які загінуў у зняволенні.
Глеб Нержын belsat.eu