Прысуд у справе былога беларускага спецназаўца, датычнага да знікнення апазіцыйных палітыкаў, будзе вынесены 28 верасня а 15-й гадзіне, паведамляе Праваабарончы цэнтр «Вясна».
Суд над Юрыем Гараўскім праходзіў 19-20 верасня ў судзе кантону Санкт-Гален у Швейцарыі. Пракурор запатрабаваў для экс-спецназаўца 3 гады зняволення, 2 з якіх – умоўна. Прысуд будзе вынесены ў пісьмовай форме – вусна яго агучваць не будуць.
Былы баец беларускага САХРу Юрый Гараўскі ў 2019 годзе публічна заявіў пра сваю датычнасць да знікнення апазіцыйных палітыкаў. У 1999 годзе ў Беларусі зніклі былы міністр унутраных справаў Юрый Захаранка, экс-кіраўнік Цэнтрвыбаркаму Віктар Ганчар і бізнесовец Анатоль Красоўскі. Афіцыйнае расследаванне знікнення вынікаў не дало, праз дваццаць гадоў яго зусім спынілі.
На судзе Юрый Гараўскі папрасіў прабачэнне ў родных і блізкіх выкрадзеных і забітых палітыкаў. Былы спецназавец разлічвае на ўмоўны тэрмін, бо прызнаўся ў выкраданнях і віны не адмаўляе.
Дачка Юрыя Захаранкі лічыць, што тэрмін пакарання, які для Гараўскага запатрабаваў пракурор, занадта малы.
Марыя Міхалевіч belsat.eu