Рэальная колькасць палітвязняў у Беларусі можа быць на тры тысячы большай, чым ёсць у спісах праваабаронцаў. Пра гэта заявіла прадстаўніца Аб’яднанага пераходнага кабінету ў сацыяльных пытаннях Вольга Гарбунова.
«Палітвязынак і палітвязняў можа быць у тры разы больш, чым мы думаем. І клапаціцца трэба аб кожнай і кожным», – заявіла Вольга Гарбунова.
Яна адзначыла, што ў Беларусі, паводле падлікаў праваабаронцаў, 1500 палітвязняў. Але толькі на адной Гомельшчыне Следчы камітэт са жніўня 2020 год завёў 1500 «экстрэмісцкіх» крымінальных справаў, тады як праваабаронцам было вядома пра 492 з іх, ці 33%.
Гарбунова тлумачыць гэта страхам сваякоў палітвязняў «пагоршыць умовы ўтрымання і пазбавіць апошняга шанца на вызваленне ці перакваліфікацыю артыкулу». Таксама «палітычны пераслед нярэдка маскіруецца пад эканамічнымі артыкуламі, «хуліганствам», «наркатычнымі» справамі і іншым».
Апроч таго, заявіла прадстаўніца АПК, падыход праваабаронцаў часам перашкаджае прызнанню палітвязнямі тых, каго абвінавачваюць у гвалце супраць сілавікоў і пашкоджанні маёмасці.
«Зыходзячы з падлікаў і сведчанняў відавочцаў, у турмах па палітычных матывах можа знаходзіцца 4500-5000 чалавек. Ці нават больш», – сказала Гарбунова.
Паводле яе, варта дапамагаць кожнаму, «не звяртаючы ўвагі на фармальны статус затрыманага чалавека».
Пра неабходнасць узмацнення дапамогі былым палітвязням заявіў магілёўскі актывіст Валянцін Лабачоў. Паводле яго, «некаторыя палітычныя пасля вызвалення проста жабруюць».
Якуб Хруст belsat.eu
