На пасяджэнні Савету бяспекі вайскоўцы з Аляксандрам Лукашэнкам абмеркавалі праект абноўленай Канцэпцыі нацыянальнай бяспекі. Пра новаўвядзенні ў дакуменце піша БелТА.
Аляксандр Лукашэнка падчас сустрэчы з вайскоўцамі 20 лютага заявіў, што ў Беларусі неабходна адаптаваць Канцэпцыю нацыянальнай бяспекі пад сённяшнія рэаліі:
«Геапалітычная цікавасць да Беларусі з боку заходняга гегемона – гісторыя не аднаго стагоддзя. Але тэхналогіі і метады вядзення гібрыдных войнаў пастаянна ўдасканальваюцца. А мы павінны глядзець яшчэ далей і працаваць на апярэджанне».
Дзяржаўны сакратар Савету бяспекі Аляксандр Вальфовіч распавёў, што ў абноўленым дакуменце з’явіцца тэрмін «электаральны суверэнітэт». Паводле яго, гэта права без умяшання звонку ладзіць выбары і рэферэндумы.
Акрамя гэтага, у канцэпцыі зʼявілася біялагічная бяспека. Усебеларускі народны сход стаўся асобным субʼектам у канцэпцыі.
Праект канцэпцыі чыноўнікі абяцаюць зацвердзіць у наступным годзе.
Алена Аляксандрава belsat.eu
