Міністр культуры Беларусі Анатоль Маркевіч падчас Форуму аб’яднаных культур у Санкт-Пецярбургу 17 лістапада запрасіў прэзідэнта Расейскай Федэрацыі Уладзіміра Пуціна наведаць фестываль мастацтваў «Славянскі базар» у Віцебску ў 2024 годзе. Пуцін адказаў, што пастараецца прыехаць, піша ТАСС.
Анатоль Маркевіч распавёў, што наступны «Славянскі базар» будзе прысвечаны гадавінам вызвалення Беларусі і Саюзнай дзяржавы.
«Для Беларусі наступны год азнаменаваны сакральнымі датамі – 80-годдзе з Дня вызвалення Беларусі ад нямецка-фашысцкіх захопнікаў, мы таксама будзем адзначаць 25-годдзе дамовы Саюзнай дзяржавы. Гэтым тэмам будзе прысвечаны ўнікальны фестываль, які праводзіцца ў Віцебску – «Славянскі базар», які мы захавалі разам. Дазвольце вас запрасіць на гэтую ўнікальную падзею», – звярнуўся міністр да Пуціна.
Пуцін у адказ узгадаў пра візіт у Менск, які мае адбыцца ўжо ў гэтым лістападзе:
«Вялікі дзякуй, я пастараюся. Неўзабаве буду ў Менску, там у нас мерапрыемства па галіне АДКБ праходзіць, убачуся з Аляксандрам Рыгоравічам, мы ўсё гэта абмяркуем».
Уладзімір Пуцін прыедзе ў Менск на сесію Рады калектыўнай бяспекі АДКБ, якая адбудзецца 23 лістапада. Беларусь сёлета старшынствуе ў АДКБ. У 2024 годзе старшынства пяройдзе да Казахстану.
Раней прэм’ер-міністр Арменіі Нікол Пашыньян паведаміў, што не прыедзе на паседжанне Рады.
За 10 месяцаў 2023 года Лукашэнка і Пуцін сустракаліся 7 разоў. Усе гэтыя разы Лукашэнка ляцеў да Пуціна ў Расею. Прэзідэнт РФ быў у Менску апошні раз у снежні 2022 года.
Марыя Міхалевіч belsat.eu
