ПВК Вагнэра стварыла ў Беларусі адукацыйную фірму. Што яна будзе рабіць, улады не ведаюць
У адзіным дзяржаўным рэгістры Міністэрства юстыцыі з’явілася інфармацыя пра рэгістрацыю ў Асіповіцкім раёне ТАА «Група “Вагнэр”». Відам дзейнасці фірмы пазначаныя «іншыя віды адукацыі». Каго і чаму будуць навучаць баевікі, мясцовыя ўлады не ведаюць.
Таварыства з абмежаванай адказнасцю «Група “Вагнэр”» зарэгістраванае 3 жніўня. Від дзейнасці – «іншыя віды адукацыі, не ўлучаныя ў іншыя групы». Гэта могуць быць курсы павышэння кваліфікацыі, карэкцыйныя курсы, курсы выжывання.
Паводле звестак выдання «Зеркало», статутны фонд кампаніі – 200 рублёў, яе ўласнік – грамадзянін Расеі Максім Пятроў.
Фірма зарэгістраваная Асіповіцкім райвыканкамам на адрас у вёсцы Цэль, дзе месціцца палявы лагер вагнэраўцаў.
У Пратасевіцкім сельскім выканкаме, куды ўваходзіць гэтая вёска, не ведаюць, каго і чаму будуць вучыць баевікі. Карэспандэнту «Белсату», які назваўся прыватнай асобаю, там сказалі, што не яны рэгістравалі кампанію і ніякіх звестак пра яе не маюць:
«Сельскі выканкам такую кампанію не рэгістраваў. Гэта не кампетэнцыя сельскага выканкаму. Чым яны будуць займацца – такой інфармацыяй не валодаю».
У прыёмным пакоі Асіповіцкага раённага выканкаму таксама нічога не ведаюць пра педагогаў-вагнэраўцаў:
«Не ўяўляю наогул. Першы раз пра гэта чую. Ніхто ніколі не званіў і не пытаўся пра гэта».
Як раней паведамлялі дзяржаўныя крыніцы, галоўная мэта прысутнасці наймітаў у Беларусі – трэнаванне вайскоўцаў.
У ліпені Магілёўскі аблвыканкам зарэгістраваў іншую юрыдычную асобу, наўпрост звязаную з кіраўніком ПВК Вагнэра Яўгеніем Прыгожыным, – ТАА «Канкорд Менеджмент і Кансалтынг». Від дзейнасці – кіраванне нерухомай маёмасцю. Кампанія належыць расейскай фірме з такой жа назваю, яе ўладальнік – Прыгожын.
Сяргей Крот belsat.eu
