У Гомлі суд атрафаваў Валянціну Міронаву, якая была затрымана сілавікамі ва ўласнай кватэры ў дзень вяртання сына дамоў пасля адміністрацыйнага арышту. Але цяпер знік яе сын, валанцёр Ілля Міронаў. Аб гэтым паведамляе «Гомельская вясна».
Гомельскія праваабаронцы паведамляюць, што 17 сакавіка Валянціну Міронаву мясцовы суд аштрафаваў на 11 базавых велічыняў, прысуд вынеслі па артыкуле 19.11 («Распаўсюд экстрэмісцкай прадукцыі»). Вядома, што пры затрыманні яе вадзілі ў кайданках у «позе ластаўкі» – так водзяць толькі страшных злачынцаў,якіх баяцца сілавікі.
Аднак пакуль што невядома месца знаходжання Іллі Міронава, сына Валянціны, валанцёра. Сёння Іллю апошні раз бачылі ў судзе Савецкага раёну Гомля, дзе хлопец чакаў разгляду справы маці і меў намер трапіць на паседжанне. З таго часу сувязі з ім няма і дзе ён знаходзіцца – невядома. Імаверна, ён затрыманы. Праваабаронцы лічаць, што на жанчыну аказваюць ціск за дзеянні сына.
Валянціну затрымалі 16 сакавіка прама ў кватэры, у якой пры гэтым страшна перавярнулі рэчы і мэблю. Аб гэтым праваабаронцам паведаміў Ілля Міронаў, які ўбачыў кватэру ў такім стане, вярнуўшыся дадому пасля 13 сутак адміністрацыйнага арышту. Пры гэтым не было вядома, куды знікла Валянціна. Праз нейкі час сын знайшоў запіску «Ілля, я ў РУУС», якую маці паспела напісаць і пакласці далей ад вачэй сілавікоў перад самым затрыманнем. Гэта ўжо 6-ы ператрус у кватэры Міронавых з 2020 года.
Мінулы раз валанцёра, паводле яго слоў, затрымлівалі за скаргі на праўладныя тэлеграм-каналы і прапагандыстаў, якія ён дасылаў у Міністэрства інфармацыі і Следчы камітэт.
Антон Тачняк belsat.eu
