Падобна, 11 жніўня на аэрадроме пад Гомлем быў знішчаны танк Т-72 або падобны. Але там застаецца яшчэ шмат расейскай тэхнікі, якую могуць выкарыстаць супраць Украіны. Магчыма, Расея рыхтуе вялікі ракетны ўдар па Украіне.
Вынікі аналізу маніторынгавай групы «Беларускі Гаюн» спадарожнікавых здымкаў з аэрадрому ў Зябраўцы, што пад Гомлем, апублікаваў праект «МотолькоПомоги».
Як піша «Гаюн», 11 жніўня каля 00.25 былі бачныя 8 сполахаў, чутныя выбухі. Спадарожнікавыя здымкі кампаніі MAXAR дазваляюць ідэнтыфікаваць на месцы выбуху танк Т-72 або падобны. Але побач з месцам выбуху бачная і іншая тэхніка. На 12 жніўня на аэрадроме ўсё яшчэ былі:
- зенітна-ракетныя комплексы С-400 «Трыумф» – 10-14 адзінак;
- зенітны ракетна-гарматны комплекс «Панцыр» – 2 адзінкі;
- радыёлакацыйная станцыя «48 Я6 Падлёт» – 2 адзінкі;
- радыёлакацыйная сістэма РПН 92Н6Е;
- радыёлакацыйная сістэма КАСТА-2Е2;
- верталёт Мі-8;
- вышкі з радыёлактарам падсвятлення і навядзення 5Н66 і 92Н6Е;
- ад 15 да 60 ракет для С-400 (з пачатку жніўня ракеты падвозілі пяць разоў).
Таксама ў ваколіцах мае быць аператыўна-тактычны ракетны комплекс «Іскандэр», але яго на здымках не відаць. Але каля месца выбуху бачна браняваную рамонтна-эвакуацыйную машыну БРЭМ-1 і аўтакран.
У ваколіцах аэрадрому, у лесе за ўзлётна-пасадачнай паласой стаяць таксама танкі Т-72 і БМП 11-й і 120-й гвардзейскіх асобных механізаваных брыгадаў са Слоніма і Менску, салдаты Узброеных сілаў Беларусі ахоўваюць аэрадром у адзенні без знакаў адрознення, піша «Гаюн». Расейскія салдаты ж займаюцца ў Зябраўцы найперш сродкамі супрацьпаветранай абароны, жывуць у намётавым мястэчку на аэрадроме і здымаюць кватэры ў Гомлі (па-за аэрадромам перасоўваюцца ў цывільным адзенні і на цывільных машынах).
Як лічыць «Гаюн», Расея рыхтуецца да масаванага ракетнага ўдару па Украіне: ракеты для С-300/400 усё падвозяць, а апошні абстрэл быў 28 ліпеня.
Афіцыйная версія здарэння 11 жніўня – «каля 23-й гадзіны падчас кантрольнага прабегу адной з адзінак тэхнікі пасля праведзенай замены рухавіка адбылося яе ўзгаранне». Пры гэтым Зябраўка ў паведамленні фігуруе не як база і не пункт дыслакацыі, а проста ўчастак мясцовасці.
Украінскі бок не пацвярджаў і не абвяргаў сваю датычнасць да ўзгарання ў Зябраўцы. Заяўлялі толькі, што маюць адносна здарэння толькі тыя звесткі, якія агучваюць міністэрствы абароны Беларусі і Расеі. Але неафіцыйна «намякалі» на тое, што выбухі ў Беларусі і Крыме звязаныя.
Алесь Наваборскі belsat.eu
