20-гадоваму Пятру Пажытных, чыю кватэру ва Уруччы 13 красавіка штурмавалі сілавікі без апазнавальных знакаў, прысудзілі 12 содняў за парушэнне парадку арганізацыі ды правядзення масавых мерапрыемстваў (ч. 1 арт. 24.23 КаАП, былы арт. 23.34). Нібыта маладзён вывесіў бел-чырвона-белы сцяг у вакне, хаця і ён, і ягоная жонка сцвярджаюць адваротнае.
Рашэнне прысудзіць Пятру Пажатных 12 содняў вынесла 15 красавіка суддзя Першамайскага раёну Настасся Кулік. Менчука на паседжанне не прывезлі, хлопца далучылі праз «Skype».
Паводле братавай Дар’і, якая прысутнічала ў судовай зале, Пётр выглядаў стомленым, быццам не спаў з моманту затрымання. Міліцыянты ў пратаколе напісалі, што сцяг вісеў на гаўбцы, але на фота, далучаным да справы, ён быў у вакне без гаўбца. Справу адправілі на дапрацоўванне, выправілі месца знаходжання штандара.
Супраць Пятра сведчылі невядомыя сілавікі ў масках. Маргарыта, жонка Пятра, якую таксама выклікалі ў якасці сведкі, кажа, што ніколі не бачыла і не вывешвала нацыянальнай атрыбутыкі ў кватэры:
«Сведкі міліцыянты блыталіся ў паказаннях. У той дзень, калі ГУБАЗіК дзверы ламаў, сцяг ніхто не вывешваў, ніякай атрыбутыкі ў вокнах не было. Паводле фатаграфіяў, прыкладзеных да справы, іх зрабілі ў дзень, калі да нас уварваліся. Бо адным з пакояў мы не карыстаемся, я ведаю, як і што там ляжыць. І на фота ўсё гэтак сама. Мяне тады закрылі ў гасцёўні, Пеця ляжаў тварам у падлогу ў спальні. Можна было пакласці і сфатаграфаваць усё што заўгодна.
Нашага сабаку чуў увесь раён: ён гучна брэша, але не кідаецца на людзей. Яны наказалі мне зачыніць яго на гаўбцы, папярэдзілі, што калі на іх кінецца, то застрэляць. Да таго ж курылі ў нашай спальні».
Таксама Маргарыта адзначае, што Пётр чамусьці сябе агаварыў:
«На судзе ён сказаў, што цяпер нічога не вывешваў. Нібыта вывешваў увосень сцяг, калі мяне не было, а калі я вярталася, то яго здымаў. Я не ведаю, чаму і навошта ён так сказаў. Можа, яму загадалі так сказаць».
Сілавікі без апазнавальных знакаў раніцай 13 красавіка прыйшлі з ператрусам да маладой сям’і – Пятра і Маргарыты Пажытных. Каб трапіць у кватэру, яны выбілі шкло на балконе і ўзламалі дзверы. Пазней у тэлеграм-канале «Жёлтые сливы» з’явіўся допіс з відэа, на якім Пётр распавядае, што быў затрыманы за тое, што ў чаце «Уручча – грамадзянская супольнасць», які ён адміністраваў, «з’яўляліся заклікі да перакрыцця дарог і радыкалізму».
ДР belsat.eu