Улады распавялі, колькі замежнікаў скарысталіся бязвізам. Лічбы выглядаюць неверагодна
Дзяржаўны памежны камітэт сцвярджае, што за год у рамках бязвізавага рэжыму ў Беларусь уехала больш за паўмільёна замежнікаў.
З 15 красавіка 2022 года дзейнічае бязвізавы парадак уезду ў Беларусь для грамадзянаў Літвы і Латвіі, а з 1 ліпеня 2022 года – для грамадзянаў Польшчы. Бязвіз будзе дзейнічаць да канца 2023 году.
Паводле Дзяржаўнага памежнага камітэту, з пачатку дзеяння бязвізавага рэжыму ў Беларусь прыбылі 504 649 замежнікаў: 329 136 грамадзянаў Літвы, 32 989 неграмадзянаў і 109 943 грамадзяніна Латвіі, а таксама 32 581 грамадзянін Польшчы.
Толькі з пачатку 2023 году ў Беларусь заехала 119 647 жыхароў суседніх краін Еўразвязу: 80 869 грамадзян Літвы, 21 809 грамадзян і 6 110 неграмадзян Латвіі, а таксама 10 859 грамадзян Польшчы.
Варта адзначыць, што насельніцтва Літвы складае 2 млн 860 тысяч чалавек. Калі верыць лічбам Памежнага камітэту, то атрымліваецца, што цягам апошняга года па бязвізу Беларусь наведаў амаль што кожны восьмы (!) жыхар Літвы.
Глеб Нержын belsat.eu
