Выданне «Медыязона» апублікавала дакумент, дзе гаворыцца пра наступствы атакі на расейскі самалёт-лакатар у Мачулішчах. «Нязначныя пашкоджанні купала», – паведамляецца ў справаздачы. Гэты дакумент апынуўся ў адкрытым доступе ў выніку маштабнага выцеку.
У арыгінале напісана «minor damage to its rotodome», што перакладаецца як «нязначныя пашкоджанні купала». Менавіта гэтая частка самалёта прызначаная для разведкі ды навядзення.
Спраўджаных звестак пра тое, якія менавіта пашкоджанні атрымаў борт, няма. Вядома толькі, што самалёт выправілі на рамонт у Таганрог. Паведамлялася, што транзітны палёт адбыўся на ніжэйшай, чым звычайна, вышыні, імаверна, праз пашкоджанні герметызацыі кабіны.
Раней брытанскае выданне «The Economist», спасылаючыся на выцек дакументаў Пэнтагону, напісала, што за атакай на расейскі «лятучы радар» А-50 у Мачулішчах могуць стаяць не беларускія партызаны, а Служба бяспекі Украіны.
Адказнасць за дыверсію ўзяло на сябе аб’яднанне «ByPol». Кіраўнік арганізацыі Аляксандр Азараў казаў «Белсату», што расейскі самалёт атакавалі з дронаў. Паводле яго, дыверсію ўчынілі ўдзельнікі плана «Перамога», якія паспяхова выехалі за межы Беларусі.
Сакрэтныя дакументы Пэнтагону былі апублікаваныя ў закрытым чаце геймераў. Напярэдадні ФБР затрымала 21-гадовага вайскоўца, які, імаверна, кіраваў гэтым чатам і можа быць датычны да выцеку канфідэнцыйнай інфармацыі.
Сяргей Крот belsat.eu